Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 12 fevereiru 2021 (TATOLI)—Ministériu Administrasaun Estatál liuhosi Sekretariadu Tékniku Programa Nasionál Dezenvolvimentu Suku (PNDS) hahú halo sosializasaun iha kada munisípiu, postu no suku sira hodi rekolla dadus benefisáriu elejível ba kbiit laek.

“Ha’u simu ona dadus benefisiáriu uma kbiit laek purvolta 35%, ne’ebé ekipa PNDS identifika ona iha terrenu,” Ministru Administrasaun Estatál, Miguel Pereira de Carvalho, informa foin lalais ne’e iha Pálasiu Governu.

Governante ne’e otimista fulan ikus fevereiru ne’e, PNDS bele konklui ona identifikasaun ba benefisiáriu hamutuk 1.272 ne’ebé elejível asesu uma kbiit laek iha territóriu laran.

Hafoin identifikasaun, iha marsu nia laran hahú inisia transfere orsamentu ba konta bankária PNDS iha suku, atubele hahú konstrusaun iha abríl.

Notísia relevante: Semana oin, Governu sensibiliza programa konstrusaun “Uma Kbiit Laek” ba komunidade

Iha Orsamentu Jerál Estadu (OJE) 2021, Governu liuhosi MAE aloka millaun $25 hodi konstrui uma hamutuk 1.272, ne’ebé kada suku sei konstrui uma tolu.

Aleinde ne’e, Governu mós estabelese ona kritériu ba banefisáriu sira hanesan  kbiit laek duni, idozu, kondisaun uma rezistente a’at no rendimentu mínimu, maibé mós tenke iha rai.

Enkuantu, modelu uma iha tipu rua hanesan medida metru kuadradu 38 ho kuartu rua ne’ebé kompleta ho dapur no haris fatin no ida seluk medida metru kuadradu 42 ho kuartu tolu inklui iha dapur no haris-fatin ne’ebé sei haree tuir membru família.

PNDS define ona materiál ba uma, ne’ebé sei uza materiál konstrusaun hanesan batako, semente, kalen no seluk tan.

Entretantu, uma ba kbiit laek hanesan programa VIII Governu Konstitusionál atu fó tratamentu dignu ba sidadaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here