Ministra Saúde, Odete Maria Freitas Belo ho Komisáriu KFP, António Freitas asiste asinatura termu aseitasaun ba Profisionál Saúde iha área Enfermazen na’in 59 iha Salaun Palásiu Cinzas, Caicoli, kinta (11/02). Imajen/MS

DILI, 12 fevereiru 2021 (TATOLI)—Komisaun Funsaun Públika (KFP) ho Ministériu Saúde (MS) realiza serimónia asinatura termu aseitasaun ba rekrutamentu públiku profisionál saúde iha área Enfermazen na’in 59 iha Salaun Palásiu Cinzas, Caicoli, kinta (11/02).

Ministra Saúde, Odete Maria Freitas Belo, hateten maski tinan 2020 Governu enfrenta hela difikuldade liuliu iha kestaun orsamentu no surtu COVID-19, maibé la taka dalan ba KFP ho MS atu implementa atividade sira-ne’ebé relasiona ho rekrutamentu ba rekursu umanu hodi prienxe lakuna ne’ebé MS presiza tebes tuir kompromisu atu haforsa programa Saúde na Familia (SnF) iha tinan 2021.

Notísia Relevante:Funsionáriu MS 180 kontinua estudu iha UNTL

“Sira ne’ebé simu Termu Aseitasaun nu’udár profisionál saúde sei liga diretamente ho pasiente iha Kuidadu Prestasaun Primáriu no ospitalár sira iha área espesializasaun enfermazen,” Odete hateten liuhosi diskursu.

Governante ne’e mós informa katak, Misaun hosi MS iha VIII Governu Konstitusionál maka asegura no fortifika sistema nasionál saúde iha nível hotu-hotu ba estabelesimentu kuidadu prestasaun saúde hanesan Ospitál Nasionál, Rejionál, Munisipál, Sentru Saúde, Postu Saúde, SISCA no SnF estabelesimentu sira-ne’e hotu mak sei hatudu dezempeñu prestasaun saúde.

Prosesu ne’e tomak, nia hatutan, hahú hosi proposta maihosi Ministériu Saúde ne’ebé hato’o ba KFP, anunsia vaga, submisaun dokumentu, avaliasaun no verifikasaun dokumentu, anunsia rezultadu selesaun dukumentu, teste ba kandidatu sira-ne’ebé kumpre rekizitu ba selesaun dokumentu, anunsia teste rezultadu hodi hato’o ba KFP atu bele halo omologasaun.

“Tanba ne’e Profisionál Saúde iha área enfermazen na’in 59 hetan omologasaun hosi Prezidente KFP hodi tuir Termu Aseitasaun iha loron ne’e. Prosesu rekrutamentu ne’e hatudu trasparénsia kontabilidade no responsabilidade hodi hasees koluzaun, nepotizmu no familiarizmu,’’ nia subliña.

Ministra ne’e iha esperansa boot katak, kompromisu, dedikasaun no profisionalizmu nu’udár funsionáriu servidór Estadu ne’ebé sei koloka no destaka hodi presta serbisu iha nível hotu-hotu atu fó prestasaun direta ba komunidade, Ospitál Referénsia, Sentru Saúde, Postu Saúde Komunitária sei iha metin prinsípiu hodi tau aas-liu interese nasaun-nian.

Entretantu, Termu Aseitasaun ne’e sei integra tuir Dekretu-Lei númeru 13/2012, 7 Marsu kona-bá Rezime das Carreiras dos Profissionais Saúde, ne’ebé iha anesku B espesifikamentu define estatutu karreira  enfermazen, no sei koloka bazeia ba nesesidade Ministériu Saúde.

Serimónia asinatura Termu Aseitasaun ne’e asisti direta hosi Komisáriu KFP ne’ebé responsabiliza ba portofóliu iha prosesu disiplinár, António Freitas.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here