Ministra Saúde, Odete Maria Freitas Belo ho Reitór UNTL, Joao Soares Martins selebra asinatura MoU iha Palasiu das Cinzas Caicoli, Segunda (01/02). Imajen Tatoli/Egas Cristovão

DILI, 01 fevereiru 2021 (TATOLI)— Ministériu Saúde (MS) ofisialmente entrega funsionáriu na’in 180 ba Universidade Nasionál Timor Lorosa’e (UNTL), hodi kontinua estudu diploma III iha área enfarmájen no parteira.

Serimónia asinatura termu entrega ne’e hala’o iha salaun MS Caicoli, entre Ministra Saúde Odete Maria Freitas Belo ho reitór UNTL, Francisco Soares Martins.  

”Ami entrega profisionál saúde hamutuk na’in 180 ba UNTL atu hasa’e sira nia koñesimentu no abilidade. Durante ne’e sira serbisu iha área saúde ne’ebé na’in 90 sei kontinua estudu diploma III enfarmájen no área parteira na’in 90,’’ Odete hateten liu hosi diskursu, segunda (01/02).

Governante ne’e hatutan, maski tinan 2020 Minsitériu Saúde hasoru difikuldade boot iha orsamentu no mós situasaun surtu COVID-19, maibé la taka dalan hodi elabora kooperasaun  liuliu aselera prosesu tomak to’o entrega termu ida ne’e.

“Esforsu ne’e parte rua konsege konklui tanba Ministériu Saúde nia misaun atu asegura no fortifika sistema nasionál saúde iha nível estabelesimentu kuidadu prestasaun saúde,” nia subliña.

Odete esplika, misaun VIII Governu atu asegura sistema nasionál saúde iha nível estabelesimentu hahú kedan iha unidade sira ho nia programa Serbisu Integradu Saúde Komunitária (SISKA) ne’ebé ko’alia kona-bá kuidadu saúde primária, Postu Saúde, Sentru Saúde, Ospitál Rejionál no Referál sira, inklui Ospitál Nasionál Guido Valadares.

“Ha’u fiar katak, iha formasaun pós laborál ida ne’e atu haforsa no hadi’a liu tan ita-nia prestasaun serbisu, haree ba planu nasionál seitór saúde to’o 2030,’’ Odete Belo akresenta.

Iha fatin hanesan reitór UNTL, João Soares Martins, hateten asina akordu ne’e estabelese ona desde VII Governu konstituisionál, maibé la konsegue implementa no ohin realiza duni.

”Ha’u reprezenta UNTL atu simu sira. Iha akordu ne’e ami bele hahú ona prosesu ensinu aprendizazen ba estudante pós laborál enfarmájen no parteira iha tinan letivu ida ne’e,’’ João Soares Martins esplika.

Reitór ne’e deklara katak, UNTL liuhosi ninia Fakuldade Siénsia Saúde prontu atu fó formasaun iha área saúde liuliu kona-bá diploma III iha rai laran.

Nia fó ezemplu katak, bainhira hakarak haruka estudante sira ba kursu iha rai liur, eseptu sira ne’ebé hakarak hasai espesialidade iha área medisina nian hanesan kardiolojia no seluk tan.

Nune’e mós bolseiru Arsénio Afonso agardese ba Minsitériu Saúde tanba bele oferese ona bolsu estudu diploma III iha UNTL.

“Ha’u agradese ba oportunidade hosi Ministériu Saúde no UNTL. Ha’u espera katak, formasaun ne’e sei fó vantajen di’ak ba hau-nia futuru nune’e bele hadi’a liu tan ha’u-nia nível edukasaun  iha área enfarmajen,’’ Arsénio agradese.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here