Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 11 fevereiru 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, husu ba Ministru Defeza (MD), Filomeno da Paixão de Jesus, ho ekipa atu ezekuta ona  Orsamentu Jerál Estadu (OJE) 2021 hodi halo rekrutamentu ba kadete foun sira.

Majór Jenerál Lere duvida no preokupa to’o agora tama ona fevereiru, maibé orsamentu ba Komandu F-FDTL ba tinan 2021 nian ho montante millaun $25.1 seidauk bele ezekuta.

“Desizaun polítika iha polítiku sira-nia liman, ha’u prevee rekrutamentu forsa ba  abríl, mas ha’u agora mós duvida, tanba osan 2021 seidauk ezekuta ne’e, tanba fulan ida de’it ona Governu labele rezolve,” Lare Anan Timor afirma ba jornalista  iha Kuartél Jenerál F-FDTL, Fatuhada, Dili, kinta ne’e.

Notísia Relevante : Tinan ne’e, Governu prevee ona osan rekruta membru F-FDTL

Lere dehan, to’o agora nia rasik seidauk simu relatóriu kona-ba prosesu suku farda foun F-FDTL no preparasaun lojístika ba membru F-FDTL foun.

OJE 2021 ba Komandu F-FDTL ne’e inklui mós rekrutamentu membru foun sira no programa ho kódigu 388 kona-ba defeza nasionál sei gasta $22,404,219, programa ho kódigu 412 kona-ba implementasaun polítika jéneru sei gasta $20,000 no programa ho kódigu 510 kona-ba governasaun di’ak no jestaun institusionál sei gasta $2,747,510.

Antes ne’e, iha fevereiru 2020, Ekipa Konjunta Rekrutamentu F-FDTL Ministériu Defeza no Komandu F-FDTL simu ona formuláriu hosi aplikante joven feto-mane Timoroan hamutuk ema-na’in 11.000 maka hatama ona dokumentu kompletu hodi konkorre ba vaga rekrutamentu membru F-FDTL ne’ebé presiza ema na’in-600.

Iha parte seluk, Agência TATOLI tenta konfirma preokupasaun ne’e ba Ministru Defeza, Filomeno da Paixão, maibé seidauk iha tempu atu fó klarifikasaun tanba okupadu ho servisu Estadu nian.

Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here