Ofisiál F-FDTL iha selebrasaun Aniversáriu FALINTIL ba dala-44 iha Kuartél Jenerál Fatuhada, Dili, 20 Agostu 2019. Imajen Tatoli/António Gonçalves

DILI, 04 fevereiru 2021 (TATOLI)—Primeiru-Ministru (PM), Taur Matan Ruak, informa tinan ne’e Governu prevee ona orsamentu ba rekrutamentu FALINTIL-Forsa Defeza Timor-Leste (F-FDTL), tanba ne’e tinan ne’e sei realiza rekrutamentu ne’ebé antes ne’e adia.

“Tinan ida-ne’e (2021) ba rekrutamentu sira (F-FDTL) nia osan iha,” PM Taur hateten hafoin enkontru semanál ho Prezidente Repúblika, Francisco Guterres ‘Lú-Olo’, iha Palásiu Prezidensiál, Bairro Pité, kinta ne’e.

Xefe Governu hato’o kestaun ne’e relasiona ho planu Ministériu Defeza noKkomandu F-FDTL atu halo rekrutamentu ba membru foun hamutuk na’in-600 iha fulan-abríl nia laran.

Planu rekrutamentu ne’e tuir polítika Governu, atu kompleta númeru F-FDTL ba 3.600.

“Ita-nia serbisu no planu ne’ebé halo agora ne’e, orsamentu tau tinan kotuk, planu ne’ebé halo ba tinan 2021 ne’e orsamentu sei tau ba tinan 2022 nian, ne’ebé ita kada tinan halo de’it buat ne’ebé ita planeia no ita osan iha ona, ida ne’ebé seidauk planeia no osan laiha ne’e ita lalika ko’alia,” Xefe Governu afirma.

Iha Orsamentu Jerál Estadu (OJE) 2021, verba ba Ministériu Defeza inklui F-FDTL hamutuk millaun $45, enkuantu ba F-FDTL rasik hamutuk millaun $25.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here