Vise Primeiru-Ministru Asuntu Solidariedade Sosiál no Inkluzaun, Armanda Berta dos Santos prezide reuniaun komisaun Interministerial hodi defini planu Vasinasaun AstraZeneca, Covid-19, iha salaun MSSI Caicoli, kinta (21/01). Imajen Tatoli/Egas Cristovão

DILI,21 janeiru 2021 (TATOLI)—Komisaun Interministeriál ne’ebé lidera hosi Vise Primeira Ministra no Ministra Solidariedade Sosiál no Inkluzaun, Armanda Berta dos Santos, hahú halo preparasaun ba vasinasaun COVID-19 ho naran vasina AstraZeneca.

Armanda hateten, enkontru dahuluk ne’e seidauk iha desizaun ruma ne’ebé ezekutivu sira foti, maibé iha ona entendimentu atu oinsa mak téknikamente sai prioridade ba vasinasaun ne’e iha Timor-Leste.

Notísia Relevante:PM prontu vasina “dahuluk” ai-moruk AstraZeneca prevene COVID-19

“Komisaun Interministeriál  hala’o enkontru dahuluk, kona-bá ezekusaun planu estratéziku vasinasaun AstraZeneca ba COVID-19, ne’ebé tempu badak sei to’o iha Timor Leste. Ohin, ko’alia liu oinsá tékniku sira halo preparasaun ba vasinasaun ida ne’e,’’ Armanda hateten ba jornalista sira iha salaun MSSI, Caicoli, kinta ne’e.

Kona-bá prioridade ba ema hirak ne’ebé mak sei simu uluk vasinasaun ne’e, ekipa interministeriál sei diskute fila-fali iha enkontru tuir mai.

“Ami seidauk deside loloos se mak sai prioridade atu simu uluk vasinasaun ida ne’e, tanba ne’e ita sei deside fila-fali,’’ nia informa.

Bainhira hetan ona desizaun ruma iha enkontru tuir mai, Armanda hateten, sei lori ba Konsellu Ministru  hodi hetan aprovasaun, nune’e  bele  implementa vasinasaun ida ne’e.

Ekipa interministeriál ne’e kompostu hosi Vise Primeira Ministra no Ministra Solidariedade Sosiál no Inkluzaun, Ministériu Saúde, Ministériu Negósiu Estranjeiru no Kooperasaun, Ministériu Interiór, Ministériu Asuntu Parlamentár no Komunikasaun Sosiál, no Ministériu Transporte no  Komunikasaun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here