Sekretáriu Estadu Terras no Propriedade (SETP), Mário Ximenes. Imajen/Espesiál

DILI, 10 fevereiru 2021 (TATOLI)-Sekretária Estadu Terras no Propriedade  (SETP) sei estabelese komisaun terras hodi bele rezolve disputa rai iha territóriu ne’ebé antes ne’e Servisu Nasionál Kadastru (SNC) rejista ona.

Sekretáriu Estadu SETP, Mario Ximenes, hateten atu estabelese komisaun ne’e ho baze mai hosi lei  definisaun titularidade númeru 13/2007 iha artigu 54, no mós presiza tan diploma lejizlativu balun tanba ne’e Ministériu Justisa prepara  dekretu lei kona-ba estabelese komisaun terras ne’ebé aprezenta ona Konsellu Ministru.

Notísia Relevante : SNC Rejista Ona Parsela Rihun 310

Komisaun ne’e, Mario Ximenes, esplika ninia kompozisaun mai hosi jurista ema na’in-neen ne’ebé bele mai hosi juiz, prokurador, defensor, grupu advogadu, sosiedade sivíl no tékniku própriu  ema na’in-tolu hosi terras propriedade.

“Komisaun ne’e independente iha administrasaun no desizaun koletiva atu rezolve no deside kazu disputa rai,” Sekretáriu Estadu Mario Ximenes, hateten ba Agência TATOLI iha nia kna’ar fatin, Dili, kuarta ne’e.

Nia hateten, bainhira aprova no vigora ona sei hahú haree hodi estabelese komisaun ne’e.

Tuir númeru parsela rai ne’ebé antes ne’e Servisu Nasionál Kadastru (SNC) halo tiha ona  rejistu númeru iha territóriu hamutuk 318,000.00  ne’ebé entrega ona ba DNTP iha ne’ebé iha parsela rai  hamutuk 42,000.00 mak sei iha disputa  ho ninia klasifikasaun entre rai privadu no privadu (hanesan balun sukat rai liu tiha ida ninia baliza ka area ) no  disputa privadu  ho Estadu (hanesan privadu mak sukat fali rai Estadu hotu).

Mario Ximenes klarifika, hosi númeru disputa ne’e terras propriedade foin rezolve to’o 8% tanba ne’e hein katak komisaun terras ne’ebé sei estabelese bele rezolve ho di’ak liután.

Prioridade  ba dezenvolvimentu kadastru nasionál

SETP kontinua tau prioridade ba tinan ne’e hodi fó kontinuidade hosi dezenvolvimentu ba kadastru nasionál iha terras no propriedade halo levantamentu no aumenta númeru parsela kadastrál iha territóriu nasionál.

Sekretáriu Estadu Mario Ximenes, informa  ho planu programa ne’e mak kontinua haree ba servisu ne’ebé SNC halo tiha ona rejistu númeru parsela rai iha territóriu hamutuk 318,000.00  ne’ebé entrega ona ba DNTP.

Nia hateten, SETP hahú halo rekrutamentu ba kuadru funsionáriu temporáriu sira ne’ebé mak SNC uza hodi integra fila-fali mai iha diresaun terras propriedade  hodi bele kontinua fila-fali servisu sira.

“Prepara ekipa téknika identifika fila-fali  hodi halo verifikasaun rai no uma tuir klase nune’e  bele aplika arrendamentu ho presu razoavel   ho Estadu hodi aumenta reseita ba Estadu,’’ Mario Ximenes hateten.

SETP mós kontinua halo rejistu ba parsela rai iha territóriu ne’ebé seidauk rejistu bele rejistu fila-fali no  mós  ba parsela rai  sira ne’ebé SNC halo rejistu ona ekipa sira sei verifika fila-fali  tuir ninia klasifikasaun hanesan rai Estadu sei regulariza aplika arrendamentu  no rai ne’ebé ho klasifikasaun  privadu laiha disputa SETP sei emite sertifikadu na’in ba rai.

Sekretáriu Estadu Mario Ximenes, hateten durante ne’e SETP mós kolleita ona reseita arrendamentu movies no imovies (rai no uma Estadu) ne’ebé  Governu halo kontratu ho arrendatariu iha  tinan 2018  rekolla  millaun $2.8, 2019 (millaun $3.5), 2020 (millaun $4.2) ho númeru  arrendatariu 4,600-resin.

SETP sei kontinua sensibiliza informasaun ba públiku ne’ebé utiliza patrimóniu Estadu atu voluntáriu hodi halo rejistu, nune’e Estadu bele regulariza hodi hasae reseita ba Estadu.

Jornalista   : Nelson de Sousa

Editór        : Francisco Simões

PUBLISIDADEiklan

1 KOMENTÁRIU

  1. entao sekretariu estado kala sai fali patraun..fo fali servisu ba komisaun..nudar cidadaun lakonkorda modelo servisu hanesan ne’e..se hanesan ne’e la-bele iha ministru no sekretario estado..iha dei’it PM pois harii komisaun hodi ba servisu diak liu.

HAKEREK NO HATÁN

Please enter your comment!
Please enter your name here