Sekretáriu Estadu Terras no Propriedades Mário Ximenes. Imajen/ António Goncalves.

DILI, 13 janeiru 2020 (TATOLI)- Sekretáriu Estadu Terras no Propriedade (SETP), Mário Ximenes   dehan, Sistema Nasionál Kadastru (SNC-sigla Portugés) durante tinan 2013 too dezembru 2019, konsege rejista parsela (rai pedasuk) hamutuk rihun 310.

Notísia Relevante : “Parsela” 271 Mill Mak Rejista Ona Hosi SNC Durante Tinan 6

“Parsela ne’ebé maka SNC sukat ona tuir alvu ne’e rihun 310 tenkesér rejistu, maibé agora sira (SNC) rejistu liu tiha ona alvu ne’ebé ita fó,”  informa Sekretáriu Estadu Mário  Ximenes ba Ajénsia TATOLI, foin lalais ne’e, iha Kuartél Jerál Polisia Nasional Timor-Leste (TNL), Caicoli Dili.

Husi totál parsela ne’ebé rejista ona, identifika parsela sira ne’ebé sei disputa hamutuk porsentu 25.

Kona-ba prosesu atu fó sertifikadu ba rai, Sekretáriu Estadu Mário Ximenes dehan, agora daudaun Ministériu Justisa haree hela prosesu hotu foin prodús sertifikadu hodi fó ba na’in ba rai sira ne’ebé sukat ona no la mosu disputa. Nune’e mós ba rai sira ne’ebé sei mosu disputa sei rezolve hotu foin bele fó sertifikadu.

Notiísia Relevante : SNC Rejista Ona Rai Komunidade Rihun 280 Resin

“Kona-ba sertifikadu ne’e estadu prepara hela lei prinsipál rua, ida Kódigu de Kadastru, ida Kódigu de Rejistu Superiór. Lei rua ne’e maka fó kompeténsia ba ita oinsá ita atu rejistu no define títulu hodi fó sertifikadu ba ita nia sidadaun sira,” nia hatete.

Nia hatutan, agora daudaun governu Timor-Leste prepara hela lei rua hodi kontinua servisu ba oin para fó sertifikadu ba parsela sira ne’ebé sukat ona.

“See SNC nia mandatu remata entrega ba ita tuir informasaun iha 150.000 parsela maka seidauk rejistu. Ne’ebé husi parsela 150.000 ne’e ita bele kategoria husi rejistu de parsela ne’e estadu maka sei kontinua ida ne’e,” nia hatete.

Notísia Relevante : SNC Nakloke Simu Auditória

Relatóriu ikus husi servisu hotu-hotu ne’ebé SNC prodús tuir planu sei entrega ba Governu Timor-Leste iha tempu besik.

Iha parte seluk, bainhira Ajénsia TATOLI halo konfirmasaun direta reprezentante Kompañia Konsórsiu SNC, Jorge Manuel de Araújo Serrano,  kona-ba progresu servisu ne’ebé SNC prodús, maibé Jorge labele fó komentáriu.

“Asuntu ne’e ita bele entrevista mak ho Señór Ministru  Justisa no Sekretáriu Estadu Terras no Propriedade (SETP),” hateten  Jorge Serrano hodi halo resposta simples ba Ajénsia TATOLI liuhusi mensajen  WhatsApp.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here