Koordenadór Rádiu Akadémika, Universidade Nasionál Timor Lorosa’e (UNTL), Miguel Gonçalves. Imajen/Espesiál.

DILI, 10 fevereiru 2021 (TATOLI)-Rádiu kontribui promove valór sosiál, ekonomia no kultura iha interasaun ema nian iha moris lorloron.

Koordenadór Rádiu Akadémika, Universidade Nasionál Timor Lorosa’e (UNTL), Miguel Gonçalves hateten, iha kontestu Timor-Leste ema barak ne’ebé mak seidauk iha televizaun, la asesu ba jornál, bele rona rádiu.

Notísia Relevante: Rona Rádiu Konsolida Relasaun Sosiál

“Normalmente, rádiu iha kanál ne’ebé úniku loos hanesan programa ida naran fans club katak bele halibur sidadaun sira-ne’ebé mak sintoniza rádiu ne’e, bele halibur malu, koñese malu, no fahe esperiénsia ba malu atu partisipa iha programa ka eventu ruma,” Responsável másimu Rádiu Akadémika, Miguel Gonçalves ba Agência TATOLI, iha ámbitu hodi komemora loron mundiál ba rádiu nian ne’ebé anualmente realiza iha loron 13 fevereiru, iha nia knaar fatin, Liceu, UNTL, Dili, kuarta ne’e.

Koordenadór Rádiu Akadémika FM, 90.00 Mhz ne’e reforsa, rádiu mós sai espasu ema promove produtu.

Akadémiku UNTL ne’e rekoñese, Timor-Leste iha kultura oioin tanba ne’e ho programa sira-ne’ebé media audiotivu sira fornese, bele fahe mós informasaun ba sidadaun, husi leste ba oeste, norte ba sul, atu influénsia ba malu, promove valór kultura, iha relasaun no iha intendimentu ba malu.

“Iha aspetu ida-ne’e, rádiu labele la’o mesak tanba transmite ita-nia informasaun sira-ne’e presiza hatene audiénsia ne’e asesu no interrese duni ba informasaun ne’e ka lae,” nia konsidera.

Nia hatutan, iha kontestu Timór ema barak liu mak asesu ba rádiu, maske nune’e tuir akadémiku ne’e katak seidauk iha peskiza ruma kona-ba persentajen. Tanba ne’e, nia sujere primeiru mak tenke halo peskiza hodi buka hatene saida mak komunidade no audiénsia sira presiza, oinsá mak konsolida no promove di’ak liután programa sira hanesan ekonomia, kultura no sosiál.

“Asuntu sira-ne’ebé mak ohin loron sai problemátiku mak edukasaun sívika. Tanba ne’e, atu lori sidadaun sira-nia partisipasaun ba dezenvolvimentu nasionál mak valoriza no promove di’ak liután (edukasaun) síviku ne’e. Edukasaun sívika ida-ne’e mak bele harahun ema-nia hanoin aat sira,” nia esplika.

Rádiu mós dezempeña papél importante iha promosaun no konsolidasaun pás. “Joven sira ne’ebé iha área risku, área sira-ne’ebé mak poténsia ba konflitu bele involve sira iha programa rádiu nian. Sira bele mai fahe esperiénsia kontribui pás iha sosiedade no dezenvolvimentu”.

Promove partisipasaun joven

Iha parte seluk, Diretora Rádiu Liberdade, Teodosia dos Reis Ximenes hateten, rádiu ajuda promove mós partisipasaun joven no vulnerável sira hanesan ema ho defisiénsia. Rádiu mak hanesan meiu komunikasaun importante bá sosiedade sira, bele rona iha fatin ne’ebé de’it.

Diretora Rádiu Liberdade, Teodosia dos Reis Ximenes. Imajen/Espesiál.

“Ami hili joven sai hanesan ami ninia target (alvu) audiénsia tanba daudaun ita-nia joven presiza tebes hetan informasaun barak kona-ba vaga serbisu no eskola,” Ezekutiva Rádiu Liberdade, Teodosia dos Reis informa, iha estudio Rádiu Liberdade, Hudilaran, kuarta ne’e.

Alumni Komunikasaun Sosiál, Universidade Nasionál Timor Lorosa’e (UNTL) ne’e akresenta, ezisténsia rádiu inkluzivamente Rádiu Liberdade mak sai promotora ba joven sira no halo inkluzasaun ba ema ho defisiénsia.

“Ami hakarak ema hotu partisipa atu fó sai sira-nia lian husi rádiu no sira-nia perspetiva husi rádiu, mak ami inklui ema difisiente. Kada semana, ami fó formasaun no oferese espasu ba sira depois sira rasik mak halo no lori programa iha rádiu, halo produsaun  programa ba iha rádiu,” Responsável rádiu ho FM 95.8 Mhz hateten.

“Ami mós inklui ema sira-ne’ebé mak komunidade marjinalizadu sira iha ami-nia programa hanesan kolega sira-ne’ebé ema ladún fó sai sira-nia lian. Ami dalabarak liu promove talentu joven sira-nian iha rádiu, saida mak sira halo ami sempre iha espasu ba sira atu promove sira, ida-ne’e ami hanaran rádiu ninia pilar importante inkluzivu,” nia dehan.

Tuir nia, rádiu sai mós espasu ba ema atu fó-sai nia lian, espresa nia hanoin kona-ba valór pozitivu sira inklui partilla esperiénsia sira liuliu timoroan sira iha estranjeiru ba timoroan sira-ne’ebé mak agora hela iha rai laran.

“Fahe sira-nia esperiénsia moris iha rai li’ur ba timoroan sira ne’ebé mak agora daudauk  prepara aan atu ba iha  rai li’ur. Mais ou menus sira serbisu iha área tasi, problema saida mak sira hasoru iha ne’ebá, oinsá ema ida prepara aan, ida-ne’e  hanesan oportunidade ida, ema ida-ne’ebé mak laiha serbisu ka ema-ne’ebé hakarak atu halo serbisu iha rai-li’ur pelumenus sira mós hetan informasaun,” Diretora Rádiu Liberdade ne’e haktuir.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here