Peskizadór Miguel Gonçalves

DILI, 29 dezembru 2019 (TATOLI)-Rezultadu peskiza dosente Departamentu Komunikasaun Sosiál, Universidade Nasionál Timor Lorosa’e (UNTL), Miguel Gonçalves konklui katak rona rádiu nu’udar meius konsolida relasaun sosiál.

“Relasaun sosiál ne’e entre parte tolu, lokutór, rona-na’in no komunidade enjerál,” konklui peskizadór Miguel Gonçalves iha nia rezultadu peskiza kona-ba Rádiu, Agência TATOLI asesu, ohin.

Iha peskiza ne’e, peskizadór rekolla dadus primáriu no sekundáriu. Dadus sira ne’e kompoe estudu dokumentál no informandu xave sira hanesan rona na’in rádiu (ouvinte) no fans rádiu husi kada estasaun rádiu sira iha Dili.

Husi rezultadu peskiza ne’e, Dosente Miguel Gonçalves iha kualidade nu’udar peskizadór konklui mós katak: “Rádiu iha vantajen boot liu veikúlu impresu sira tanba entre públiku radiofóniku inklui mós faixa populasaun analfabeta”.

Enkuantu, iha semináriu nasionál kona-ba “Halibur Opiniaun Públika Relasiona Ho Papél Media Iha Dezenvolvimentu Nasionál Timor-Leste” iha loron 18 dezembru liubá iha UNTL, Akadémiku UNTL, Miguel Gonçalves akresenta liután katak iha sosiedade liuliu foinsa’e sira uza kanál rádiu nu’udar kanál ba divertimentu nian. Alende ne’e, sira mós utiliza kanál espesífiku ba rádiu ne’e diretamente atu kria relasaun sosiál hanaran “Friends club”.

“Joven sira hosi Timór laran tomak inklui RAEOA sira iha friends audience, hosi parte ne’e sira kria grupu ajuda malu no iha relasaun di’ak liután, iha parte sira ne’ebé di’ak.  Entaun ne’e mak peskiza ne’ebé hau halo,” nia haktuir.

Nune’e liga ho papél akadémiku ba prosesu dezenvolvimentu ba komunikasaun sosiál iha Timor-Leste, Dosente Miguel Gonçalves hateten: “Hosi papél akademia nian, ami kontribui direta kedas liuliu ba iha dezenvolvimentu rekursu umanu”.

Notísia relevante:Mídia Kontribui Konsolida Relasaun Sosiál

Jornalista    : Nelia Borges

Editór          : Rafy Belo

HAKEREK NO HATÁN

Please enter your comment!
Please enter your name here