Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão.

DILI, 10 fevereiru 2021 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, entrega ona esbosu Dekretu-Lei ba Konsellu Ministru (KM) ho konteúdu atu regula estudante bolseiru iha rai laran ne’ebé ho kategoria rejimi hakbi’it.

“Esbosu hosi Dekretu-Lei rejimi hakbi’it nian ita hato’o ona ba Konsellu Ministru. Agora ita hein de’it kalendáriu atu halo diskusaun,” Ministru Longuinhos dos Santos, ba jornalista sira iha Palásiu Governu hafoin enkontru KM, kuarta (10/02).

Notísia Relevante:Estudante 5.582 admitidu ba UNTL no IPB

Nia esplika, ho esbosu Dekretu-Lei ne’ebé iha, bainhira iha diskusaun mak hetan duni aprovasaun hosi KM bele sai hanesan meiu legál ida hodi regula estudante sira ne’ebé sei sai benefisiáriu Governu nian iha rai laran.

“Normalmente ita aplika ona bolsu estudu ba liu estudante sira iha rai-liur bazeia ba Lei ne’ebé vigora ona. Iha tinan ida-ne’e, ita iha tan rejimi foun hanaran hakbi’it ne’ebé presiza tebes Lei ida atu bele regula tanba estudante sira ne’e sei hetan bolsa estudu iha rai laran,” Governante ne’e subliña.

Entretantu, tinan ne’e MESSK hala’o prosesu selesaun ba estudante foun ne’ebé asesu Ensinu Superiór Públiku bazeia ba Diploma Ministeriál Númeru 32/2020, 16 setembru.

Diploma ne’e fó kompeténsia ba Komisaun Asessu Ensinu Superiór (KAES) atu disemina informasaun iha munisípiu hotu-hotu kona-bá Rejime Jerál no Rejime Espesiál ne’ebé MESSK rasik uza.

Rejimi Jerál ne’e fó oportunidade ba finalista hosi Ensinu Sekundáriu ne’ebé remata iha tinan 2020.

Enkuantu, Rejime Espesiál fó oportunidade ba kandidatu ho situasaun esesionál iha kategoria haat mak hanesan, Primeira, kategoria oportunidade fó biban ba estudante sira ne’ebé remata ona iha tinan haat ba kotuk.

Segunda, kategoria Veteranu no Mártir sira-nia oan, fó biban ba veteranu no mártir sira-nia oan atu asesu ba Ensinu Superiór Públiku.

Terseira, kategoria Hakbi’it  ne’ebé fó biban ba ema kbiit la’ek sira no Kuarta, kategoria sira seluk hosi rejime espesiál ne’ebé fó biban ba lisensiadu sira, ema estranjeiru, Timoroan ne’ebé remata Ensinu Sekundáriu iha estranjeiru, eskola internasionál, diplomata, PNTL, F-FDTL, defisiente no rezidente sira iha Manufahi.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here