Ministru Justisa, Manuel Cárceres da Costa. Imajen Tatoli/António Gonçalves

DILI, 10 fevereiru 2021 (TATOLI)-Ministru Justisa (MJ), Manuel Cárceres da Costa, esplika  lejizlasaun kódigu rejistu prediál ho kódigu kadastru sei sai nu’udar mekanizmu atu emite sertifikadu na’in ba rai ba sidadaun sira.

“Lejizlasaun rua  kódigu rejistu prediál ho kriasaun rejime jerál ezekusaun asesu informasaun kadastrál (kódigu kadastru) importante tebes sei sai mekanizmu no dalan atu lori ita prodús sertifikadu atribuisaun títulu na’in ba rai,’’ Ministru Justisa, Manuel Cárceres da Costa, hateten ba Agência TATOLI  iha nia kna’ar fatin, Dili, kuarta ne’e.

Notísia Relevante : SETP sei estabelese komisaun terras rezolve disputa rai

Nia informa Ministériu Justisa aprezenta ona ba iha Konsellu Ministru (KM)  kona-ba lejizlativu rua ne’e no daudaun iha ona faze sirkulasaun hodi hein aprovasaun KM  nian.

Nia esplika, lejizlasaun rua-ne’e dekretu lei tanba ne’e bainhira hetan ona aprovasaun iha nivel KM  mak Prezidénsia Konsellu Ministru (PCM) sei haruka direita ba  gabinete Prezidente Repúblika (PR)  hodi bele promulga.

Ministru Manuel Cárceres, hatutan bainhira lejizlasaun ne’e  tama ona iha vigór maka Ministériu Justisa sei halo tan diploma ministerial bele  hahú emite modelu sertifikadu na’in ba  rai.

Nia hatutan, daudaun ne’e iha dadus kadastrál hosi rezultadu Servisu Nasionál Kadastru (SNC) ne’ebé halo  ona rejistu númeru parsela rai hamutuk 318,000.00  maibé iha parsela rai 42,000.00 mak sei iha disputa .

“Sira ne’ebé laiha disputa , ita tun ba iha terrenu hodi halo konfirma fila-fali keta iha mudansa laiha buat ida bele emite ka fó daudaun sertifikadu na’in ba rai no sira ne’ebé sei iha disputa komisaun terras ne’ebé  ita sei harii buka bele rezolve,” Ministru Manuel Cárceres hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here