Sekretáriu Estadu Formasaun Profesional no Empregu, Julião da Silva hamutuk ho Sekretáriu Estadu Terra no Propriedade, Mario Ximenes no Vise Ministru Obra Publika, Nicolau Lino Freitas, hala’o sosialiazasaun dahuluk ba projetu konstrusaun sentru Formasaun exelente ba komunidade efeitadu sira iha salaun administrasaun postu administrativu Metinaro. Imajen/ Cipriano Colo

DILI, 09 setembu 2019 (TATOLI) – Sekretáriu Estadu polítika Formasaun Profisionál no Empregu, Julião da Silva, hahú halo diálogu no sosializasaun dahuluk kona-ba projetu konstrusaun Sentru Formasaun Exelente, iha postu administrativu Metinaro, Munisípiu Dili.

Iha oportunidade ne’e, Julião da Silva hateten polítika VIII Governu Konstitusionál mak fó oportunidade servisu ba joven sira, tanba ne’e liuhosi sentru formasaun ne’e sei kontribui reduz númeru dezempregu iha rai laran.

Maski presiza tempu no esforsu maibé governante ne’e fiar katak fatin ne’e sei iha kondisaun atu fó serbisu ba timoroan na’in 60.000, tuir kompromisu Governu nian.

“Liuhosi sentru formasaun ne’e, timoroan sira sei hetan formasaun ne’ebé di’ak no kualidade iha área oioin, no garante katak bele kompete iha merkadu traballu internasionál”, tenik.

Kona-ba projetu konstrusaun, parte tekniku sira dezeña hotu ona no nia estasaun sei akumula ema to’o 5.000.

Sentru Formasaun exelente ne’e sei harii iha rai hectare 27, no sei konstrui edifísiu iha juñu 2020 ho orsamentu millaun $15.

Oras ne’e dadaun, Governu liuhosi Sekretaria Estadu polítika Formasaun Profisionál no Empregu (SEFOPE), sei kria ekipa ida ne’ebé kompostu husi ministériu relevante sira atu bele hahú halibur dadus ba afeitadu sira inklui estudu viabilidade.

Julião da Silva husu ba komunidade sira iha Metinaro atu labele fa’an rai arbiru tanba aban bain-rua ema barak sei mai husi munisípiu hotu, inklui estranjeiru hodi hela iha sentru formasaun, nune’e komunidade bele fó aluga rai ka bele halo de’it uma hodi aluga.

Nia informa, sentru formasaun Metinaro sei harii hanesan sentru ne’ebé di’ak liu iha Azia no ema husi nasaun seluk mós sei mai tuir formasaun, maibé sei tau prioridade liu ba joven Metinaro.

Formasaun ne’ebé sei estabelese iha sentru ne’e mak hanesan formasaun fíziku kompostu husi elétrika, pedreiru, no seluk tan, enkuantu formasaun naun fíziku mak hanesan restaurante, otél, negósiu, inklui formasaun ba mina no gás.

Expertu husi nasaun seluk mak sei fó formasaun iha sentru ne’e.

Nune’e mós, Vise Ministru Obra Publika, Nicolau Lino Freitas, hateten papél Ministériu Obra Públika (MOP) nian mak sei halo supervizaun, monitorizaun no fiskalizasaun ba kualker projetu Governu inklui projetu sentru exelente.

Tanba ne’e governante ne’e husu ba komunidade atu kontribui ba konstrusaun projetu ne’e tanba sei fó vantajen direta ba povu liliu ba Metinaro- oan sira.

Nune’e mós iha biban ne’e, Sekretáriu Estadu Terra no Propriedade, Mario Ximenes, hateten sentru formasaun ne’e harii ho objetivu atu tulun Timor-Leste atu adere ba organizasaun ASEAN.

Nia dehan, komunidade afeitadu husi projetu ne’e hamutuk 74 tanba ne’e Governu sei matein fó indeminizasaun ho opsaun rua mak hanesan, Governu fó de’it osan no opsaun seluk mak Governu halo de’it bairru foun, depende ba afeitadu sira mak hili.

Jornalista : Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here