Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (04/11). Imajen Tatoli/Egas Cristovão

DILI, 04 novembru 2020 (TATOLI)—Iha reuniaun Konsellu Ministru (KM) kuarta ne’e, Ministru Administrasaun Estatál (MAE), Miguel Pereira de Carvalho, aprezenta opsaun polítika-lejizlativa rua.

Ministru Prezidénsia Konsellu Ministru, Fidelis Manuel Leite Magalhães, hateten opsaun rua ne’e hanesan proposta lei alterasaun dahuluk ba Lei Resenseamentu Eleitorál no ba projetu proposta lei kona-ba alterasaun datoluk Lei Órgaun Administrasaun Eleitorál nian inklui proposta lei ba alterasaun datoluk Lei Órgaun Administrasaun Eleitorál nian.

“Alterasaun normativa ne’e ho objetivu atu prosede ajustamentu balun ba prosedimentu  resenseamentu, hodi konfere  transparénsia ba prosesu resenseamentu eleitorál, nune’e mós bele introdúz ajustamentu balun  ba Lei Órgaun Administrasaun Eleitorál,” Ministru Fidelis informa iha Palásiu Governu hafoin reuniaun ezekutivu.

Governante ne’e esplika, ajustamentu ne’e liuliu iha promosaun kolaborasaun entre Komisaun Nasionál Eleisaun (CNE, sigla portugés) no Sekretariada Téknika Administrasaun Eleitorál (STAE), nune’e permite koordenasaun ne’ebé efikáz entre órgaun rua hodi atinje padraun ne’ebé aas liuhosi edukasaun sívika entre populasaun no divulgasaun informasaun ba matéria eleitorál.

Maski nune’e, seidauk iha desizaun ba aprezentasaun ne’e no sei lori iha reuniaun tuir mai.

“Foin halo aprezentasaun ho objetivu membru Governu sira iha entendimentu di’ak liután intesaun hirak ne’ebé MAE iha, nune’e bainhira lori proposta alterasaun sira mai Konsellu Ministru karik, ezekutivu sira informadu tiha ona no bele iha diskusaun ne’ebé kle’an liután iha ministériu relavante idaidak,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here