Reprezentante komunidade no na’in ba rai, Rogério Marçal no Koordenadór Nasionál Rede ba Rai (RbR), Pedrito Viera, hamutuk ho komunidade uma-kain 11 hala’o konferénsia imprensa iha Aldeia 01 Sentru ba Unidade, Suku Caicoli, Dili, tersa (09/02). Imajen Tatoli/Eugénio Pereira

DILI, 09 fevereiru 2021 (TATOLI)- Uma-kain 11 iha Aldeia 01 Sentru ba Unidade, Suku Caicoli, Munisípiu Dili ho Organizasaun Rede ba Rai (RbR) husu ba Governu liuhosi Diresaun Nasionál Terras no Propriedade (DNTP) no Komandu Jerál Polísia Nasionál Timor-Leste (PNTL) atu deside didi’ak valór indemnizasaun ba vítima sira ho justu no transparénsia ba públiku.

Reprezentante Komunidade no nain ba rai, Rogério Marçal, dehan bainhira governu seidauk tuur diálogu ho sira hodi deside valór kompensasaun labele ameasa povu atu hamamuk fatin ne’ebé sira okupa tinan barak ona.

Notísia Relevante : Uma-kain 11 iha Caicoli hato’o rekomendasaun ba Governu ho PNTL

“Ami rejeita totál deklarasaun hosi Komandante PNTL, Komisáriu  Faustino da Costa, tanba iha prosesu negosiasaun dala-barak, ona maibé seidauk iha akordu kona-ba valór indemnizasaun ba ami nia propriedade,” Rogério Marçal hateten liuhosi konferénsia imprensa iha Caicoli, Dili, tersa ne’e.

Nia dehan, bainhira Governu la sériu atu deside valór indemnizasaun, maka komunidade sei la sai no sei lori prosesu ba tribunál.

Abitante no RbR konsidera deklarasaun Komisáriu Faustino hodi fó deadline loron 10 ba povu hodi hamamuk sira-nia hela fatin nu’udar ameasa ida kontra direitu umanu no viola lei.

“Ami rejeita atu hamamuk ami nian fatin ba orden ilegál hirak ne’ebé deklara hosi Komisáriu Faustino da Costa,” Rogério Marçal hateten.

Nia hatutan, komunidade no na’in ba rai sira iha Caicoli konsidera deklarasaun ne’e hanesan forma ameasa no terror hanesan aktu abuzu ba podér no la iha sentidu umanidade, tan ema hotu sofre hela konsekuénsia husi estadu emerjénsia no hasoru difikuldade ekonomia oi-oin hosi situasaun difisil ba surtu Covid-19.

Abitante afetadu uma-kain 11 sei la hakru’uk ba kualkér orden ilegál no sira sei la hamamuk fatin refere bainhira Governu la halo tuir prosedimentu lei númeru 8/2017 kona-ba espropriasaun, tanba utilidade públiku iha artigu 41 (Rekizitu Prevee Ba Pose Administrativa).

Nia hatutan, povu sira prontu koopera atu muda sai, bainhira Governu deside ona valór orsamentu klaru ba sira.

Iha fatin hanesan, Koordenadór Nasionál Rede ba Rai (RbR), Pedrito Viera, lamenta tanba to’o agora Governu la sériu atu rezolve problema ne’ebé povu sira enfrenta.

RbR mós preokupa no lamenta ho deklarasaun ameasa hosi Komisáriu Faustino da Costa, atu muda sai komunidade. RbR konsidera Komisáriu Faustino la merese atu ameasa komunidade, tanba tuir lei servisu ne’e DNTP maka iha kompeténsia atu halo diálogu ho povu hodi ko’alia kona-ba asuntu problema rai.

“Komunidade hamutuk ho Rede ba Rai la konkorda katak, Komandante Faustino halo deklarasaun maka’as liubá asuntu lei nian. Tanba Faustino la’ós reprezentante hosi Governu, maibé loloos DNTP maka bele ko’alia,” nia lamenta.

Rede ba Rai husu ba DNTP atu kontinua halo diálogu aberta ho povu sira hodi buka rezolve preokupasaun povu nian.

Husu mós ba Provedoria Direitus Umanus no Justisa (PDHJ) atu hatún ekipa hodi halo investigasaun ba problema direitu umanus ne’ebé povu hasoru.

Hosi sorin seluk, portavós Komandu Jerál PNTL, Superintendente Xefe Armando Monteiro, dehan sidadaun hotu-hotu iha lei nia okus no lei mak regula ema hotu- hotu tenke kumpre regra.

Arnaldo dehan, problema ne’ebé povu sira enfrenta, Komandu PNTL no DNTP seriedade atu rezolve hodi labele afeta ba prosesu konstrusaun futuru dezenvolvimentu PNTL.

Jornalista  : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here