Imajen/Media PN.

DILI, 08 fevereiru 2021 (TATOLI)–Komisaun C (Finansa Públika) hala’o fiskalizasaun ba Munisípiu Manatuto deteta Governu sentrál seidauk halo pagamentu (selu) ba otél no catering. Relatóriu vizita fiskalizasaun hosi Komisaun C aprova iha 20 fulan-janeiru 2021.

Notísia Relevante: Governu ezekuta ona fundu COVID-19 millaun $189

Sekretária Meza Komisaun C, Relatora Deputada Nélia Soares Menezes, ne’ebé halo leitura ba relatóriu ne’e hateten ezekusaun Fundu COVID-19 ne’ebé sentraliza iha Ministériu Solidariedade Sosiál no Inkluzaun (MSSI) halo ona pagamentu hahú iha loron 11 juñu 2020 ho totál 13,723 xefe família iha Munisípiu Manauto.

Benefisiáriu hosi programa ne’e ho totál pagamentu millaun $2,744,600 durante implementasaun Estadu Emerjénsia tanba Manatuto sai mós fatin kuarentena ba estudante ne’ebé fila hosi rai-li’ur.

“Maibé pagamentu ba otél no servisu catering seidauk halo tanba ne’e Komisaun C husu Governu halo pagamentu ba dívida ne’ebé halo durante implementasaun Estadu Emerjénsia ba otél, catering no fatin kuarentena ba estudante sira,” Relatora Deputada Nélia Soares Menezes, ne’ebé akompaña hosi Prezidente Komisaun C, Deputada Maria Angélica Rangel, aprezenta relatóriu ne’e ba plenária, segunda ne’e.

Komisaun C husu Governu atu fó solusaun ba dívida ne’e tanba PN aprova kleur ona fundu COVID-19.

Iha vizita fiskalizasaun ne’e Komisaun C nota implementasaun fundu COVID-19 iha Manatuto hasoru difikuldade tanba laiha planu hosi munisipál no laiha matadalan ba ezekusaun.

Iha parte seluk, Komisaun C deteta funsionáriu servisu sosiál ezerse ona funsaun durante aplikasaun estadu emerjénsia maibé la hetan direitu ba subsídiu liña frente (frontline).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here