Ministru Finansa, Rui Augusto Gomes. Imajen TATOLI/António Gonçalves

DILI, 30 dezembru 2020 (TATOLI)–Ministru Finansa, Rui Augostu Gomes, informa Governu ezekuta ona fundu COVID-19 hamutuk millaun $189, ne’ebé ekivalente ho 59% husi totál orsamentu millaun $333.

“Kona-ba ezekusaun, husi millaun $333 ne’e to’o iha loron 30 novembru gasta ona millaun $126, ida-ne’e ezekusaun ida kiik tanba ho de’it 38%, maibé kompara ezekusaun husi loron 01 dezembru to’o 29 dezembru sa’e ba millaun $189 (59%) ne’ebé bainhira ezekusaun reál ne’e mak aumenta tan ho obrigasaun maka to’o ona 73%,” Ministru Rui Gomes deklara iha ámbitu debate ba pedidu deklarasaun Estadu Emerjénsia da-sia iha sala planária Parlamentu Nasionál (PN), kuarta ne’e.

Nia dehan, ezekusaun fundu COVID-19 la’o di’ak no ninia ritmu aseleradu sei akontese bainhira OJE 2020 aprovadu.

Kona-ba relatóriu ezekusaun fundu, tuir governante ne’e husi utilizasaun fundu to’o 31 outubru 2020, Governu haruka ona ba PN.

Enkuantu, ba relatóriu novembru konklui iha kuarta (30/12) lorokraik no sei submete ba meja PN, no dezembru seidauk konklui tanba sei halo pagamentu maibé sei submete iha semana dahuluk janeiru 2021.

Fundu COVID-19 harii abríl 2020, maibé fundu ne’e rasik sofre alterasaun dala-rua, iha fulan-juñu no outubru 2020.

“Alterasaun sira-ne’e mai tanba iha aumentu orsamentu no dada osan husi fundu mina-rai no mós kestaun seluk tán. Maibé finalidade fundu klaru katak atu finasia atividade ajuda no kombate moras COVID-19 ne’e labele da’et ba komunidade, maibé bainhira da’et mós fundu ne’e bele utiliza atu halo mitigasaun ba impaktu negativu ne’ebé bele mosu ein termu saúde no ekonómiku,” nia esplika.

Tanba ne’e, alterasaun ne’ebé Governu halo ho sentidu atu ajusta fundu ne’e uza la’ós de’it aspeitu sanitáriu maibé mós aspetu sosiál inklui rekuperasaun ekonómika.

“Atu dehan fundu ne’e ninia finansiamentu tomak ne’e mai husi fundu mina-rai, ne’ebé transfere dala-rua ona, dahuluk iha abríl no daruak n juñu, ho totál hamutuk millaun $219.500  husi fundu mina-rai,” Rui subliña.

Aleinde ne’e, Governu hetan doasaun husi Organizasaun Internasionál Traballadór hamutuk $650.000 no PN aloka $500.000 atu deputadu sira bele halo fiskalizasaun ba ezekusaun fundu ne’e rasik maibé realoka fali hodi apoia atividade rekuperasaun ekonómika.

Hafoin alterasaun fundu COVID-19 liuhusi aprovasaun OJE 2020 maka hetan adisionál millaun $113, tanba ne’e maka fundu ne’e nia totál millaun $333.

Ezekusaun fundu COVID-19 hahú abríl 2020

Iha loron 28 abríl 2020, Sekretariadu Téknika Konsellu Jestaun fundu COVID-19 halo notifikasaun ba ministériu no inistituisaun implementadór hamutuk 13 hodi hahú ezekuta no implementa fundu COVID-19.

Pakote rekuperasaun ekonómika hamutuk iha medida neen no asaun hamutuk 19 ne’ebé sei implementa to’o agora.

Programa dahuluk maka prevensaun no metigasaun COVID-19 ho ninia montante orsamentu hamutuk millaun $125,9, husi verba ne’e sei finansia sub-programa hamutuk 10, progaram daruak mak aumenta produsaun no produtividade ho ninia alokasaun hamutuk millaun $4.9 no programa datoluk maka asesu produtu alimentár iha alimentasaun servisu ho ninia alokasaun orsamentu hamutuk millaun $19,1.

Alokasaun orsamentu ba Gabinete Primeiru-Ministru hamutuk millaun $1,6, Sekretáriu Estadu Komunikasaun Sosiál (SEKOMS) hamutuk $207.000, Ministériu Agrikultura no Peska (MAP) millaun $4,9,  Ministériu Negósiu Estranjeiru no Kooperasaun (MNEK) millaun $2,4, Ministériu Finansa (MF) $900.000, Ministériu Saúde (MS) millaun $52,4, Ministériu Solidariedade Sosiál no Inkluzaun (MSSI) millaun $15.

Enkuantu, Ministériu Turizmu, Komérsiu no Industria (MTKI) millaun $6, FALINTIL-Forsa Defeza Timor-Leste (F-FDTL) millaun $12,5, Polísia Nasionál Timor-Leste (PNTL) $670.000, Sentru Lojístika Nasionál (CLN, sigla portugés) hamutuk millaun $19,1, Sentru Integradu Jestaun Krize (CIGC,sigla portugés) millaun $34,5 hanesan fundu rezerva.

Iha medida subsídiu ba eletrisidade no bee-moos ne’ebé implementa ona, ninia asaun mak fó $15 ba kada kliente Eletricidade de Timor-Leste (EDTL) ba kada fulan durante fulan-rua inklui subsídiu fulan-rua ba bee-moos, ne’ebé alokasaun ba eletrisidade millaun $7,686 no ba bee-moos ho totál orsamentu millaun $4,2.

Pagamentu subsídiu ba uma-kain ne’ebé implementa ona, ho proposta inisiál hamutuk millaun $15 maibé hafoin iha aumentu dadus uma-kainmaka montante sa’e ba millaun $65,556.

To’o jullu besik 2.000 traballadór mak hetan ona benefísiu husi medida subsídiu porsentu 60 ba traballadór, ne’ebé maka 293 husi 1993 maka motorista iha setór transporte no pagamentu ne’ebé Institutu Nasionál Seguransa Sosiál (INSS) halo ona ho montante $656.176, ne’ebé antes ne’e aloka orsamentu millaun $14,188.

Medida seluk mak apoia subsídiu ba estudante timor-oan naun bolseiru iha rai-li’ur, ne’ebé tuir dadus ne’ebé mak simu antes ne’e iha estudante naun bolseiru 3.488, ho fundu orijinál millaun $2,404, maibé hafoin ajusta ninia fundu atuál $3.273.696, ne’ebé gastu tiha ona hamutuk millaun $1,343, ne’ebé kompila ba persentajen hamutuk porsentu 41,5.

Medida transporte no konetividade iha subsídiu ba aviaun Dili-Darwin tuir proposta ne’ebé Governu hato’o $585.000, maibé hafoin alterasaun no halo ajustamentu, ninia fundu sa’e ba millaun $1,673 no konsege gasta ona millaun $1,118.

Aviaun semo bá-mai hamutuk dala 30, pasajeiru hamutuk 71 no sasán ne’ebé tula ho kuantidade kilograma 11.085.

Ba distribuisaun sasán, CLN halo proposta akizisauna foos husi Vietname, ne’ebé ho fundu orijinál ho valór $18.216.815, maibé hafoin hetan invoice no finaliza prosesu hamutuk valór millaun $17,35, ho gastu totál millaun $16,500, ne’ebé korresponde gastu totál ho porsentu 86,9.

Medida kona-ba garantia produsaun agrikultura no peska, ne’ebé daudaun implementa hela, ninia orsamentu orijinál millaun $4,952, maibé hafoin halo rekonsiliasaun sai millaun $2,437, ne’ebé gasta tiha ona millaun $1,793, korresponde ho porsentu 73,6.

Komponente kréditu ba pagamentu ba sira ne’ebé maka foti osan husi banku sira, proposta inisiál millaun $8,182 sai millaun $5.

Inklui medida seluk tan ne’ebé sei iha prosesu nia laran atu implementa. 

Jornalista: Antónia Gusmão

Editora: Julia Chatarina       

HAKEREK NO HATÁN

Please enter your comment!
Please enter your name here