Meza Bola Guling. Imajen/Espesiál

DILI, 07 fevereiru 2021 (TATOLI)Governu liuhosi Ministériu Turizmu, Komérsiu no Indústria (MTKI), Inspesaun Jerál Jogu (IGJ, sigla protugés) sei disemina ezbosu diploma ministeriál hodi regula jogu tradisionál sira hafoin aprovasaun no implementasaun.

Ezbosu ho kontiúdu to’o kapítulu V ho artigu 17, sei regula atividade jogu tradisionál inklui fó lisensa ba jogu futu-manu, bola guling, kuru-kuru, rolete, bingo, soe kilo no jogu tradisionál seluk.

“Ami-nia ekipa jurídiku hahú halo redasaun finál ba ezbosu lei ne’e, maibé ami sei disemina ba munisípiu hotu liuliu autoridade lokál inklui komunidade sira, molok aprovasaun no implementasaun diploma ministeriál ne’e atu sira tenke kumpre,” Inspestór Jerál Jogu, Domingos da Costa Guterres, informa ba Agência TATOLI, foin lalais ne’e, iha ninia knaar fatin, Bebora.

Notísia relevante: MTKI planeia konstrui sentru jogu tradisionál iha Atauro

Ezbosu diploma ministérial ne’e sei regula atividade jogu tradisionál sira, ne’ebé dezde beiala sira hala’o tanba hanesan parte turizmu komunitáriu no parte ida atu rekolla reseita.

Inspetór Jerál Jogu haktuir, iha tinan kotuk MTKI-IGJ halo ona konsultasaun públiku ho autoridade lokál no munisípiu sira inklui ba sidadaun balun ne’ebé gosta atividade jogu tradisionál sira atubele regula.

“Ami halo tiha ona konsultasaun ho autoridade lokál sira no sira fó rekomendasaun balun atu bele kria diploma regulariza atividade jogu tradisionál sira, maibé tenke halo diseminasaun antes aprova no promulga,” nia hatutan.

Nune’e, ekipa jurídiku hahú halo diskusaun redasaun finál atubele submete ba Ministru Turizmu, Komérsiu no Indústria atu analiza no aprova hodi bele hahú diseminasaun ba kada munisípiu sira.

Inspetór Jogu konsidera, MTKI presiza duni diploma ministeriál atubele regula jogu tradisionál iha territóriu laran tomak, tanba diploma ne’e hanesan lei-oan ne’ebe hamosu dekretu-lei númeru 6/2016 hodi regula espesífiku liután jogu tradisionál.

Tuir ezbosu diploma ministérial iha ártigu 4, atu hetan lisensa ba atividade ne’e, rekerente presiza halo pedidu ba IGJ, ne’ebé kompleta ho kopia billete indentidade, estatutu, rejistu krimál, referénsia bankária, númeru TIN, identifikasaun espésifiku área jogu, modelu jogu no planu realizasaun no instalasaun ne’ebé hetan aprovasaun husi IGJ.

Iha artigu 5, sita katak ba pesoál singular ne’ebé hakarak rekere ba tipu jogu ida presiza iha saldo permanente no garantia saldo iha Banku Nasionál Komérsiu Timor-Leste (BNCTL, sigla portugés) hahú husi $15.000 to’o $25.000.

Enkuantu, ba pesoál koletivu tenke iha saldo iha konta bánkaria permanente $30.000 no garantia saldo $50.000

Entretantu, iha ártigu 12 koa’lia kona-ba taxa ba futu-manu ba kada jogu selu hahú husi $100 to’o $2.000 tuir retornu ne’ebé hetan, bola guling ho taxa $100, kuru-kuru ho taxa normál $100, rolete selu taxa normál $20, bingo ho taxa $50 no taxa ba soe kilo $10.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here