Atividade jogu tradisionál bola guling. Imajen/Espesiál

DILI, 01 fevereiru 2021 (TATOLI)-Ministériu Turizmu, Komérsiu no Indústria (MTKI), liuhosi Inspesaun Jerál ba Jogu (IGJ, sigla portugés), planeia atu konstrui sentru jogu tradisionál iha illa Atauro, hanesan sentru turizmu komunitáriu atu atrai turista sira bele bá vizita.

Inspestór Jerál Jogu, Domingos da Costa Guterres, hateten MTKI koordena ona Sekretaria Estadu Terra no Proriedade (SETP) atu hahú buka rai iha Atauro atubele konstrui fatin ba atividade jogu tradisionál konsentra iha fatin ida.

Ba inistiava ne’e, IGJ hahú planu halo dezeñu no Bill of Quantity (BOQ) atu finaliza iha tinan ne’e hodi propoin ba orsamentu fiskál 2022.

“Ami-nia planu ida mak konstrui sentru jogu tradisionál iha Atauro tanba buat hotu labele halo iha Dili de’it, Atauro mós parte ida husi Dili, agora haree oinsá atu atrai turista sira ba Atauro maibé tenke kria kondisaun. Ami hein estudu nia rezultadu ne’e oinsá,” Inspestór Jerál Jogu ne’e informa ba Agência TATOLI iha ninia knaar fatin, Bebora, segunda ne’e.

Notísia relevante: MTKI hahú prepara ezbosu diploma ministeriál regula jogu tradisionál

Tuir nia, sentru ne’e hanesan modelu ida atu rekolla reseita ba Estadu no sei implementa iha munisípiu hotu hodi fásil kontrola no regula.

Aleinde ne’e sei akumula hotu jogu tradisionál ne’ebé desde beiala sira halo no daudaun atividade ne’e kontinua la’o.

“Ita hakarak sentru ne’e ba ema ne’ebé hakarak mai futu-manu, bola guling, Kuru-kuru no seluk tan ba hotu iha fatin ne’e,”nia akresenta.

Tuir ezbosu diploma ministérial iha ártigu 4, atu hetan lisensa, rekerente presiza halo pedidu ba IGJ ne’ebé kompleta ho kopia billete indetidade, estatutu, rejistu krimál, referénsia bánkaria, númeru TIN, indetifikasaun espésifiku área jogu, modelu jogu no planu realizasaun no instalasaun ne’ebé hetan aprovasaun husi IGJ.

Iha artigu 5 mós sita katak ba pesoál singular ne’ebé hakara rekere ba tipu jogu ida presiza iha saldo permanente no garantia saldo  iha Banku Nasionál Komérsiu Timor-Leste (BNCTL, sigla portugés) hahú husi $15.000  to’o $25.000.

Enkuantu, ba pesoál koletiva, saldo iha konta bánkaria permanente $30.000 no garantia saldo $50.000.

Entretantu, iha ártigu 12 koa’lia kona-ba taxa hanesan ba futu-manu nia kada jogu selu hahú husi $100 to’o $2.000 tuir retornu ne’ebé hetan, bola guling ho taxa $100, kuru-kuru ho taxa normál $100, rolete selu taxa normál $20, bingo ho taxa $50 no taxa ba soe kilo $10.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here