Diretór Jerál Servisu Korporativu, Joanico Pinto hamutuk ho Diretora Jerál Tezouru, Regina de Jesus da Sousa, klarifika pagamentu saláriu fulan-janeiru. Imajen TATOLI/Florêncio Miranda Ximenes

DILI, 05 fevereiru 2021 (TATOLI)-Diretora Jerál Tezouru, Ministériu Finansa (MF), Regina de Jesus da Sousa, informa daudaun ne’e orsamentu ba tezouru sufisiente atu finansia despeza sira, nune’e seidauk bele halo levantamentu fundu petrolíferu.

“Ita-nia cash iha tezouru sei sufisiente atu atende  nesesidade durante períodu trimestrál dahuluk tanba agora daudaun ita iha millaun $266,” Diretóra Jerál Tezouru, hateten liuhosi konferénsia imprensa iha salaun Ministériu Finansa (MF), Aitarak-laran, sesta ne’e.

Maibé, Diretora ne’e hatutan, bainhira MF haree no kálkulu despeza liu ona orsamentu iha tezouru maka sei halo pedidu levatamentu ba Banku Setrál Timor-Leste (BCTL, sigál portugés) atubele halo transferénsia osamentu husi fundu petrolífera iha Banku Federál Estadu Unidu Amérika (EUA).

“Ita sei halo projesaun, hafoin mak ita bele dada (halo levantamentu), maibé bainhira ita nota katak ita-nia orsamentu sufisiente hela maka ita labele dada tanba ita dada mai mós ita la uza, ne’ebé em vez de ita investe, maibé ita mai rai fali,” Diretóra Jerál ne’e esplika.

Notísia relevante: Saldo sei iha millaun $200-resin, Governu seidauk halo levantamentu

Governu liuhosi MF nota katak orsamentu ho millaun $266 sufisiente duni atu atende despezas iha trimestre dahuluk.

“Maibé ita haree katak ita-nia despeza aumenta iha trimestre dahuluk ne’e ita bele halo fali kálkulu atu dada fali ka levantamentu iha fin marsu ou inisíu abríl,” Responsavél ne’e akresenta.

Iha biban hanesan, Diretór Jerál Servisu Korporativu MF, Joanico Pinto, esplika  totál Orsamentu Jerál Estadu (OJE) 2021 millaun $1,8, ne’ebé Parlamentu Nasionál aprova no Prezidente Repúblika promulga ne’e Governu la halo levantamentu dala ida de’it.

Nia dehan, iha tinan fiskál iha fulan-12 ne’e normalmente fahe ba  trimestrál dahuluk to’o da-haat ne’ebé haree ba tezouru sei sufisiente seidauk halo levantamentu.

Iha jestaun fluxu kaixa (cash flow management), MF identifika nesesidade atu halo pagamentu husi insititusaun Estadu sira, maibé liu ona rezerva iha konta tezouru mak foin iha nesesidade atu halo levantamentu.

“Ita iha nesesidade mak bele halo levantamentu, maibé daudaun iha millaun $266 hela. Ita presiza entende katak levantamentu ne’e halo bainhira iha nesesidade ne’ebé dentru nafatin iha trimestrál tinan finaseiru ida ne’e laran,” Diretór Jerál subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here