Vise-Ministra Finansa, Sara Lobo Brites. Imajen Tatoli/Egas Cristovão

DILI, 03 fevereiru 2021 (TATOLI)–Governu liuhosi Ministériu Finansa (MF) seidauk bele haruka pedidu levantamentu orsamentu 2021 ba Banku Sentrál Timor-Leste (BCTL-sigla portugés) tanba saldo tezouru sei sufisiente.

“Provavelmente primeiru trimestre ita iha saldo natoon atu foti. Foin lalais, señor Ministru Finansa ko’alia, karik iha fevereiru posível foti ne’e atu prevee hela pagamentu ba cesta bázia ne’ebé mak por volta millaun $63. Se ida-ne’e mak akontese, neineik ita foti maibé seidauk foti iha fevereiru no marsu entaun abríl mak foin foti tanba saldo sei sufisiente hela. Saldo agora sei millaun $200 itál iha tezouru,” Vise-Ministru Finansa, Sara Lobo Brites, informa ba Agência TATOLI no Jornál INDEPENDENTE, iha resintu Parlamentu Nasionál, kuarta ne’e.

Nia fundamenta, millaun $200-resin ne’e hosi fundu infraestrura, fundu kapitál umanu no fundu COVID-19 tinan fiskál 2020 nian. Nia esplika, ezekusaun 2020 ba janeiru 2021 gasta ona serka millaun $60.

“Entaun ita haree katak saldo sei natoon. Atu halo levantamentu ne’e laiha serteza depende ba pagamentu boot sira-ne’ebé atu akontese. Se akontese iha fevereiru no marsu, saldo hahú redus entaun presiza ita halo levantamentu, importante mak saldo iha tezouru labele menus hosi millaun $50,” nia dehan. 

Jestaun orsamentu ne’e, nia dehan, jere hosi Ministériu Finansa tanba ne’e ministériu nota hela saldo sei sufisiente no pedidu levantamentu ne’e depende ba nesesidade.

“Laiha nesesidade ita foti osan mai tau hela iha-ne’e, husik fundu para iha funan. Importante mak saldo labele menus hosi millaun $50. Maibé, saldo agora sei iha millaun $200 itál,” Vise-Ministru Finansa subliña.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here