Diretór Jerál Servisu Korporativu, Joanico Pinto hamutuk ho Diretora Jerál Tezouru, Regina de Jesus da Sousa, klarifika pagamentu saláriu fulan-janeiru. Imajen TATOLI/Florêncio Miranda Ximenes

DILI, 05 fevereiru 2021 (TATOLI)Ministériu Finansa (MF) halo klarifikasaun relasiona ho pagamentu saláriu fulan-janeiru ba funsionáriu Estadu ne’ebé balun tama tarde, na’in-43.207 simu ona, enkuantu 144 seidauk simu.

Totál servidór Estadu hirak ne’e, nia saláriu fulan- janeiru transfere ona ba banku liuhosi sistema payroll iha 25 janeiru.

“Ita iha funsionáriu ho totál pesoál 43.351 mak iha diretu pagamentu liuhosi sistema payroll ne’ebé Ministériu Finansa mak jere, falta de’it hamutuk 144 ou ekiparadu ho 0,3% mak nia saláriu seidauk tranfere ba banku,” Diretór Jerál Servisu Korporativu MF, Joanico Pinto, informa liuhosi konferénsia impresa, iha salaun MF, Aitarak-laran, sesta ne’e.

Notísia relevante: PM Taur husu MF prosesa saláriu funsionáriu

Iha biban hanesan, Diretora Jerál Tezouru MF, Regina de Jesus da Sousa, esplika razaun funsionáriu hamutuk 114 seidauk simu saláriu, tanba iha mudansa iha baze dadus iha inísiu kada tinan, maibé kada ministériu la konfirma ba parte MF.

Husi funsionáriu 114 ne’ebé seidauk simu saláriu iha janeiru, na’in-46 husi Imprensa Nasionál Timor-Leste, I.P, ho razaun submisaun pedidu husi instituisaun ne’e rasik hodi loke sira-nia konta bankária rasik (treasury bank account) mak tarde tarde.

“Nota katak Imprensa Nasionál hanesan ajénsia autónomu foun ho autónomia administrativa no finanseira rasik,” nia akresenta.

Seluk maka Conselho de Imprensa (CI) Timor-Leste, ho totál funsionáriu ne’ebé seidauk simu saláriu hamutuk 30 ho razaun tanba kontratu mate iha 31 dezembru 2020.

“To’o loron 12 janeiru 2021, payroll seidauk simu kontratu foun husi CI no mós notifikasaun husi Komisaun Funsaun Públika atubele prosesa saláriu ba pesoál 30,” nia haktuir.

Aleinde ne’e, Ministériu Assuntu Parlamentár no Komunikasaun Sosiál (MAPKOMS) iha funsionáriu hamutuk 11 mak destaka iha Provedoria Direitu Umanu no Justisa (PDHJ, sigla portugés) maibé laiha konfirmasaun husi parte ministériu atu selu sira-nia saláriu husi orsamentu MAPKOMS.

Nune’e, MF komunika ona ba MAPKOMS no PDHJ atu fó konfirmasaun fonte orsamentu hodi selu funsionáriu 11 refere, maibé to’o ohin loron MF sei hein hela resposta husi instituisaun rua ne’e.

Sekretaria Estadu Formasaun Profisionál no Empregu (SEFOPE) iha funsionáriu pesoál 57 mak nia saláriu atrazu ho razaun tanba iha problema no mapeamentu ba kódigu orsamentál foun.

“Ne’e duni iha hela prosesu nia laran atu finaliza ba banku, ohin loron ka tarde liu segunda semana oin,” nia hatutan.

Ba profisionál saúde sira-nia saláriu fulan-janeiru selu hotu ona inklui mós retroativu, extra, turnu, tanba ne’e karik pesoál balun reklama seidauk simu, husu favór atu kontaktu Unidade Rekursu Umanu no ida-idak nia banku.

Enkuantu, saláriu décimo terseiro (gaji 13) ba Polísia Nasionál Timor-Leste (PNTL) selu hotu ona.

“Atu esplika de’it katak décimo terseiro tuir dekretu-lei númeru 63/2020, 10 dezembru 2020, selu de’it saláriu baze, esklui subsídiu alimentasaun no transporte,” nia tenik.

Diretora ne’e refere ba Universidade Nacional Timor-Leste (UNTL), nu’udar ajénsia autonómu ne’ebé iha autonómia rasik atu jere sira-nia orsamentu no realiza pagamentu direta ba banku.

“Ne’e duni ba dosente konvidadu no dosente part-time ne’ebe seidauk simu sira-nia saláriu husi fulan-outubru 2020 to’o janeiru 2021, UNTL rasik mak sei responde ba sira nia problema interna,” nia fó hanoin.

Biban ne’e, Diretora Regina hakarak informa ba públiku katak mudansa sira iha baze dadus sempre akontese iha inísiu kada tinan.

“Ne’e kondisaun normál tanba tenke atualiza tuir orsamentu ne’ebé aprovadu iha Parlamentu Nasionál. Husu Ministériu ida-idak atu esplika ba sira-nia funsionáriu kontratadu katak bainhira kontratu ramata iha 31 dezembru 2020, kada instituisaun mak tenke iha responsabilidade renova ka lae kontratu ba funsionáriu kontratadu sira, tanba sistema payroll Ministériu Finansa sei rejeita automatikamente kontratu ne’ebé mak mate,” nia subliña.

Jornalista : Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here