DILI, 04 fevereiru 2021 (TATOLI)—Primeiru-Ministru (PM), Taur Matan Ruak, husu ba Ministériu Finansa (MF) atu prosesa lalais saláriu funsionáriu sira iha kada ministériu sira.
Xefe Governu hato’o kestaun ne’e relasiona ho atrazu pagamentu saláriu funsionáriu permanente no kontratadu iha kada ministériu.
“Ha’u apela ona ba ministériu sira no Ministériu Finansa atubele rezolve lalais saláriu funsionáriu sira, ne’ebé horisehik ami mós ko’alia iha Konsellu Ministru atu rezolve lalais problema ne’e,” Xefe Governu hateten hafoin sorumutuk semanál ho Prezidente Repúblika, Francisco Guterres ‘Lú Olo, iha Pálasiu Prezidensiál, Bairro Pité, kinta ne’e.
Notísia relevante: Sara Lobo: “Ohin, funsionáriu hotu simu saláriu”
Tuir PM, normalmente kada fulan ministériu sira halo konfirmasaun ba funsionáriu permanente no kontratadu sira, hafoin submete ba MF atu porsesa pagamentu.
“Ida-ne’e atu evita selu funsionáriu mate klamar sira. Ha’u lakohi funsionáriu sira atraza simu saláriu, nune’e importante atu Ministériu Finansa ho parseiru serbisu maka’as rezolve problema ida-ne’e,” Xefe Governu sujere.
Antes ne’e, Vise-Ministra, Sara Lobo Brites, hateten Governu finaliza ona sálariu ba servidór Estadu hotu iha territóriu nasionál no iha loron kuarta (03/10), nune’e funsionáriu hotu bele simu saláriu.
Nia dehan, bainhira taka tinan no hahú ho orsamentu foun, situasaun atrazu pagamentu sempre akontese kada tinan iha fulan janeiru.
Orsamentu Jerál Estadu (OJE) 2021 ho montante biliaun $1,8, muda estutura orsamentu, muda mós kategoria ba fali programa no muda atividade, instituisaun no diresaun foun, ne’ebé presiza atualiza ba sistema payroll nian tanba ne’e mak atrazu.
Jornalista: Florêncio Miranda Ximenes
Editora: Julia Chatarina
