Espesialista ba kankru susun iha Hospitál Nasionál Guido Valadares (HNGV), Raimundo dos Santos. Imajen/média Fundasaun Alola.

DILI, 05 fevereiru 2021 (TATOLI)—To’o oras ne’e Hospitál Nasionál Guido Valadares (HNGV) enfrenta difikuldade atu kombate moras kankru susun tanba pasiente barak liu fiar ba tratamentu tradisionál.

Vise-Prezidente Komisaun Nasionál Kankru Susun Timor-Leste (KNKSTL), hanesan mós Espesialista ba kankru susun iha Hospitál Nasionál Guido Valadares (HNGV), Raimundo dos Santos, hateten difikuldade ne’e ba jornalista Agência Tatoli iha Universidade Timor Orientál (UNITAL), sesta ne’e.

Notísia Relevante:Númeru kankru susun sei aas iha TL

“Dezafiu ne’ebé médiku sira hasoru maka, pasiente kankru susun la halo tratamentu iha fasilidade saúde maibé halo fali tratamentu ho ai-moruk tradisionál. HNGV mós laiha meiu sufisiente atu bele halo sensibilizasaun no fahe informasaun ba komunidade,” Raimundo dos Santos hateten.

Ho situasaun ne’e maka, oras ne’e daudaun ekipa saúde maski ho meiu no ekipamentu limitadu, maibé sei tun ba baze atu halo sensibilizasaun ba populasaun kona-bá oinsá halakon tratamentu tradisionál no tenke aprezenta aan sedu ba iha fasilidade saúde ne’ebé besik.

Médiku ne’e preokupa ho modelu tratamentu tradisionál tanba esperiénsia hatudu katak, ema barak la konsege salva vida no númeru kankru susun sei aas iha Timor-Leste.

Dadus hosi Ministériu Saúde hatudu katak, to’o oras ne’e resjista kankru susun  hamutuk 350-resin no HNGV ho Organizasaun Mundiál Saúde (OMS) rekolla tan dadus ne’ebé tuir planu sei publika iha tempu badak.

Nune’e mós Diretora Fundasaun Alola, Maria Imaculada Guterres, iha nia diskursu komemorasaun loron mundiál kankru, la’ós de’it kestiona kona-bá atendimentu ba moras kankru ne’ebé sei maioria ba iha ai-moruk lokál, maibé mós kestiona kona-bá sistema tratamentu ba moras kankru ne’ebé barak transfere ba rai-liur.

“Ita nia lema selebrasaun loron mundiál kankru, sei motiva ema hotu atu prontu sai apoiante hodi habelar informasaun ba mudansa iha hanoin kona-bá hili atendimentu ne’ebé los tanba maioria komunidade sei uza ai-moruk tradisionál no fiar liu matan-dook,” nia hateten.

Tanba ne’e, Maria Imaculada Guterres  husu atu ema hotu-hotu bele halo advokasia, nune’e bele hadi’a sistema atendimentu (biopsia) no tratamentu (kemoterapia no radioterapia) ba moras kankru.

Alende ne’e, Angelita Gomes ne’ebé antes ne’e sofre moras ne’e fó sasin katak, prátika moris saudável maka disposizaun hosi ema idaidak-nia laran atu haksolok nafatin no tenki konsumu hahan nutritivu.

Nia mós sujere ba Governu liuliu Ministériu Saúde atu habelar informasaun kona-bá moras kankru iha baze oinsá konsiensializa komunidade tanba moras ne’e perigu ba ema nia moris.

“Governu presija prepara fasilidade ne’ebé di’ak atu fasilita ita-nia médiku espesialista sira-nia serbisu, tanba moras kankru susun ne’e aumenta ba beibeik,’’ nia sujere.

Notísia Relevante:2015-2020, feto na’in 400 sofre kankru susun

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here