Diretora Ezekutiva Fundasaun Alola, Maria Imaculada Guterres. Imajen/ Egas Cristovão.

DILI, 04 fevereiru 2021 (TATOLI)— Tuir dadus hosi programa Ha’u Hili Atu Kura (HALIKU) Fundasaun Alola hatudu katak, to’o tinan 2020 kazu kona-bá moras kankru susun ninia númeru sei kontinua aas iha Timor-Leste (TL).

Diretora Fundasaun Alola, Maria Imaculada Guterres fó sai dadus ne’e liuhosi diskursu komemorasaun loron mundiál moras kankru ho tema ‘Ha’u nu’udár apoiante no ha’u hakarak halo mudansa’ ne’ebé realiza iha salaun Universidade Timor Orientál (UNITAL) Becora, Dili, kinta (04/02).

Notísia Relevante:2015-2020, feto na’in 400 sofre kankru susun

“Feto sira ne’ebé hetan kankru susun ho idade produtivu hahú hosi 14 to’o 40 maka rejista a’as liu,” Maria Imaculada Guterres fó sai.

Fundasaun Alola liuhosi programa HALIKU rejista feto maluk ne’ebé afeita síntoma moras kankru susun, hahú hosi tinan 2014-2020 hamutuk 122, no hosi númeru ne’e pozitivu na’in 13 iha ne’ebé ema na’in ualu mak mate.

“To’o agora nia númeru ne’e sei aas iha Timor-Leste no númeru mate atinji to’o 80%,  tanba pasiente ne’ebé afeita ona moras kankru susun sempre ba halo tratamentu iha fasilidade saúde tarde, prezudika tebes atu salva sira-nia vida,” nia subliña.

Ho númeru ida ne’e maka Fundasaun Alola liuhosi programa HALIKU, hamutuk ho konsellu Nasionál kankru susun Timor-Leste, no mós UNITAL realiza semináriu ne’e atu sensibiliza inan-feto sira kona-bá importánsia prevensaun no detesaun sedu ba moras ne’e.

Nia konsidera moras kankru nu’udár moras ida ne’ebé perigu tebes no akontese iha sosiedade Timor-Leste, maibé ema barak mak tauk atu konsulta ho médiku sira, tanba ne’e ho semináriu ne’e bele konsiensializa feto sira atu halo tratamentu sedu ba salvasaun vida.

Nune’e mós Vise-Prezidente Komisaun Nasionál Kankru Susun Timor-Leste (KNKSTL), Raimundo dos Santos reforsa katak, dadus pasiente kankru susun hosi tinan 2015-2020 hamutuk 350-resin ne’ebé halo tratamentu iha Ospitál Nasionál Guido Valadares (HNGV).

Hosi númeru pasiente ne’e, nia dehan, iha estimasaun to’o 50% signifika pasiente tama ona estadium 3 to’o 4, entaun durante ne’e pasiente ne’ebé mate tanba moras kankru susun ninia persentajen to’o 80%.

“Hosi númeru 350 ne’e mós, pasiente kankru susun ne’ebé halo operasaun iha HNGV 10% katak, iha estadium 1 ka 2,” Raimundo dos Santos subliña.

Notísia Relevante:Fundasaun Alola sensibiliza informasaun ba Rede Feto kona-ba kankru susun

Jornalista: Felicidade Ximenes

Editor: Cipriano Colo

HAKEREK NO HATÁN

Please enter your comment!
Please enter your name here