Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 21 outubru 2020 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, informa Governu foti ona desizaun hodi aumenta vaga ba rejime hakbi’it ka oan ki’ak atu asesu Universidade Nasionál Timor Lorosa’e (UNTL) no Institutu Politékniku Betano (IPB) hamutuk 910.

“Ita deside ona oportunidade ba rejime rua mak hakbi’it no ba veteranus nia-oan sira atu bele asesu ba universidade sira, tan husi rejime hakbi’it ita sei loke vaga 910 no ba veteranus nia-oan sira ita loke ba estudante purvolta 600-resin,” nia informa asuntu ne’e ba jornalista sira hafoin relata kestaun ne’e ba membru Governu sira iha reuniaun Konsellu-Ministru, kuarta ne’e.

Notísia Relevante:Asesu UNTL, MAKLN propoin vaga ba veteranu nia-oan 1.300

Governante ne’e esplika vaga 910 husi rejime hakbi’it nian ne’e, UNTL no IPB sei akumula de’it estudante 510 no 400 sei koloka ba universidade privada sira iha Timor-Leste.

“Tinan ida ne’e ita hakarak iha universidade no instituisaun privada sira mós bele simu estudante rejime espesiál sira,” Longuinhos hateten.

Kona-ba rejime veteranus nia-oan 600-resin ne’e sei asesu de’it iha UNTL no IPB no daudaun ne’e Komisaun Asesu Engeresu Ensinu Superiór (KAEES) halo ona inskrisaun iha Munisípiu 12 inklui Rejiaun Administrativa Espesiál Oe-Cusse Ambeno (RAEOA).

Governante ne’e hateten kona-ba rejime jerál no espesiál, MESSK seidauk deside ninia totalidade tanba sei hein hela pedidu husi UNTL no IPB.

Notísia Relevante:Oan kiak sei asesu UNTL iha 2020

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here