Ministéru Reforma Lejislativa no Asuntu Parlamentár, Fidelis Leite Magalhães.

DILI (TATOLI)-Country Representative World Bank (Banku Mundiál), Macmillan Anyanwu hateten, sei kontinua sai parseiru importante ho Governu Timor Leste hodi apoiu dezenvolvimentu Timor Leste iha setór oi-oin.

ʺOhin ami mai hasoru ministru tanba importante oinsá atu kria parseiru hodi apoiu reforma kapasitasaun institusionál liuliu iha formasaun rekursu umanus no importante liu maka atu promove ekonomia,” reprezentante Banku Mundial ne’e esplika hafoin hasoru malu ho Ministru reforma lejizlativa no asuntu Parlamentár, Fidelis Magalhães iha Palásiu Governu Dili ohin.

Banku Mundiál parseiru ida importante tanba durante ne’e fó ona apoiu ba prosesu dezenvolvimentu liuliu iha setór agrikultura, promove ekonomia rai laran, infra-estatura hanesan Estrada Dili-Ainaru no seluk tan.

Alende ne’e, diskusaun ministru Fidelis ho Macmillan Anyanwu, parte foku liu ba kona-ba polítika desentralizasaun, dezenvolvimentu rural liuliu iha projetu bee no sanitasaun ba komunidade rural.

ʺAmi espera atu kontinua sai parseiru ho Governu Timor Leste,ʺ Macmillan Anyanwu fó sai nia esperansa.

Entretantu, Ministru, Fidelis Magalhães hateten, Timor Leste mós membru hosi organizasaun mundiál ne’e. tanba ne’e sei hametin liután parseiru ba dezenvolvimentu rai laran.

ʺIta nia kooperasaun entre Timor Leste no banku mundiál kontinua la’o,ʺ Fidelis rekoñese. No informa katak, Banku Mundiál mós hato’o ninia votus susesu ba oitavu Governu hodi hametin parseiru di’ak liu ho organizasaun internasionál ne’e, no sira seluk.

Jornalista: Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here