Defensor Públiku Jerál, Câncio Xavier. Imajen Tatoli/Nelson de Sousa

DILI, 04 fevereiru 2021 (TATOLI)-Defensor Públiku Jerál, Câncio Xavier, hateten Defensoria Públiku   menus tebes rekursu atu ativamente halo vizita regular ba prizaun hodi haree besik liu tan kliente ka sidadaun sira.

Câncio Xavier, hateten iha tinan kotuk defensoria halo atividade divulgasaun ba dadur iha  prizaun sira kona-ba direitu no devér dadur sira nian ho lei kódigu prosesu penal ho sivíl no planu ba atividade vizita ne’e sei halo  regulármente kada fulan tolu, maibé labele realiza tanba rekursu la sufisiente no fasilidade.

Notísia Relevante : 2021, edifísiu reprezentasaun DP iha Ermera ho Maliana funsiona

Nia  esplika vizita regular ne’e mós parte ida hosi defensór ida-idak bele konsulta ho nia kliente ne’ebé kumpre prizaun preventiva iha prosesu inkéritu kontinua lao bele fasilita rekolla informasaun  hodi bele  defende ka fó asisténsia ho di’ak ba kazu ne’ebé sira hasoru.

“Ho rekursu la natoon, maibé notifikasaun sira ne’ebé sai ba kliente sira hanesan prezu ita kontinua fó atendimentu mezmu ita la halo vizita regulármente ba prizaun sira tanba iha nesesidade seluk ne’ebé importante ba prosesu julgamentu la’o iha tribunal, julgamentu movel ho postu detensaun,” Defensor Públiku Jerál, Câncio Xavier, hateten hodi responde Agência TATOLI, iha nia kna’ar fatin, Kintal-Boot, Dili, kinta ne’e.

Hatán kona-ba iha situasaun balun sidadaun balun sente hasoru injustisa tanba laiha defeza atu defende ho di’ak  tanba kumpre tiha prizaun preventiva ho tinan ida ka rua ikus mai desizaun Tribunál absolve, Câncio Xavier, lia-tun dehan, prova indísiu  ne’e Tribunál mak fiskaliza hodi deside maibé parte defeza kontinua asegura.

“Iha lei  fó dalan sidadaun ida ikus mai desizaun Tribunál absolve nia iha direitu sivíl bele halo kontra Estadu  hodi ezije ninia direitu naran di’ak no tempu ne’ebé nia lakon durante hela iha prizaun,” Câncio Xavier  esplika.

Nia dehan, durante ne’e defensoria públika seidauk rejista prosesu sira ne’e tanba dalaruma sidadaun balun sei menus koñesimentu ba prosesu legál tanba ne’e defensoria públika sei halo mós divulgasaun lei.

Parte seluk, Câncio Xavier, informa presiza aumenta rekursu ema  ho fasilidade meiu finanseiru, transporte, hodi apoia servisu ho másimu liu tan, nune’e mós presiza aumenta edifísiu reprezentasaun defensoria iha munisípiu balun hodi bele lori servisu defensoria nian besik liu-tan ba sidadaun.

“Ita hakarak estatutu instituisaun defensoria públiku bele jere rasik ninia patrimonial administrativu no jestaun finanseira ne’ebé oitavu Governu liuhosi Ministériu Justisa daudaun ne’e diskute hela bele iha aprovasaun hodi nune’e mellora liu tan servisu sira,”  Câncio Xavier  hateten.

Mezmu ho limitasaun sira, nia tenik, defensoria públiku kontinua serve hodi aprosima direitu lejítimu sidadaun ho  atendimentu loro-loron kontinua lao.

Nia esplika, defensoria hola nia misaun atu fó asisténsia jurídika judisiál no extra-judisiál ba sidadaun tanba ne’e servisu defensoria hanesan servisu sosiál fó asisténsia jurídika, judisiáriu no extra-judisiál ne’ebé garante iha artigu 135 Konstituisaun Repúblika Demokrátika Timor-Leste ne’ebé esensiál hodi salva guarda direitu lejítimu sidadaun sira.

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here