Primeiru-Ministru, Taur Matan Ruak, kaer liman ho Defensoria Públika Jerál, Câncio Xavier. Imajen Tatoli/António Goncalves

DILI, 23 dezembru 2020 (TATOLI)-Defensoria Públiku Jerál iha 2021 sei lansa edifísiu reprezentasaun Defensoria Públiku nian iha Ermera ho Maliana. Nune’e, bele fó asisténsia legál ba povu sira, liuliu kbiit laek sira ne’ebé presiza hetan justisa.

Notísia Relevante : DP sei halo promosaun no progresaun ba defensór ho ofisial justisa

Defensór Públiku Jerál, Câncio Xavier, tersa (22/12), iha nia servisu fatin, haktuir ba Agência Tatoli katak konstrusaun ba edifísiu reprezentasaun Defensoria Públika iha Ermera ho Maliana, finaliza ona tanba ne’e iha 2021 sei funsiona hodi fó asisténsia legál ba povu  liu-liu kbiit laek ne’ebé presiza justisa.

“Edifísiu reprezentasaun DP nian iha Ermera ho Maliana hein kompleta tan  instalasaun bee-moos ho mobiliáriu balun tan, tanba ne’e, tinan oin bele funsiona ona,” Defensór Públiku Jerál, Câncio Xavier informa.

Nia dehan, tuir planu Defensoria Públika ba tinan oin atu harii konstrusaun edifísiu reprezentasaun iha Lautem,Viqueque no Same, maibé labele realiza tanba tuir  programa oitavu Governu ba tinan oin sei laiha infraestrutura tanba ne’e sei prevee fali planu ne’e iha 2022.

Mezmu servisu defensoria  iha munisípiu sira ne’e seidauk iha maibé, Câncio Xavier afirma,  kontinua halo aproximasaun lori justisa hakbesik ba povu liuhosi julgamentu movel.

“Servisu iha setór justisa ne’e la’o integradu hanesan juis, prokuradór no defensór   iha hotu mak julgamentu ida  bele la’o, nune’e mezmu fatin sira ne’ebé seidauk kobre ita halo kooperasaun servisu liuhosi julgamentu movel ne’ebé Governu liuhosi Ministériu Justisa tau prioridade nafatin,” nia hateten.

Daudaun ne’e Defensoria Públika eziste ona iha Dili, Baucau, Covalima no Rejiaun Administrativu Espesiál Oe-Cusse Ambeno (RAEOA).

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here