Responsável Diresaun Jestaun Kazu, Domingas Perreira. Imajen Tatoli/Cipriano Colo

DILI, 11 fevereiru 2020 (TATOLI)–Fundasaun Fórum Comunicação Juventude (F-FCJ) Oratóriu Don Bosco, Centro Miguel Magone, hanesan uma-mahon, atende labarik hamutuk 72. Husi númeru ne’e, konsege re-integra labarik hamutuk 35 bá eskola iha tinan 2019.

Responsável ba Diresaun Jestaun Kazu, Domingas Perreira esplika, F-FCJ iha programa boot rua. Primeiru maka programa protesaun ne’ebé hala’o atendimentu iha uma-mahon. Programa ida-ne’e halo atendimentu liuliu ba labarik menór idade ne’ebé hetan abuzu.

“Iha ne’ebá, iha tipu kazu oioin hanesan kazu abuzu seksuál halai liubá insestu, tráfiku umanu, abandona, tau hamutuk, no iha mós vítima ba violénsia doméstika”, Domingas hato’o lia hirak-ne’e iha Fundasaun Fórum Comunicação Juventude (F-FCJ) Oratóriu Don Bosco, Centro Miguel Magone, Balide, ohin.

Programa ida seluk, maka programa prevensaun, ne’ebé F-FCJ halo iha estrada sira, liuliu ba labarik sira ne’ebé fase karreta iha Dili laran, no mós iha área Tibar, sira ne’ebé maka mete hili fo’er no abandona eskola.

“Labarik sira-ne’e pasa tempu barak liu iha fatin lixu de’it, sira ne’ebé mete liu hili fo’er no la bá eskola. Sira ne’ebé maka iha Dili laran, sira fase karreta no motór de’it, hodi buka osan ba fa’an sasán atu sustenta uma-laran. Sira-ne’e ami identifika iha dalan ninin de’it, pois ami identifika loloos ninia problema ne’e saida. Ami halo aprosimasaun, ami deteta problema katak ema ninia ekonomia uma-laran maka abandona oan iha estrada”, nia esplika.

F-FCJ hetan fundu husi Ministériu Solidariedade Sosiál no Inkluzaun (MSSI) hodi fó ba labarik sira-ninia inan-aman no tinan 2019 MSSI fó fundu rihun $54.00 ba F-FCJ hodi aloka ba uma-mahon, ba saláriu funsionáriu sira no atende nesesidade tomak uma-mahon nian.

“Ami fó ba inan-aman sira tanba ami identifika katak problema labarik sira abandonadu tanba inan-aman nia kapasidade ekonomia uma-laran fraku”, nia hateten.

Kona-ba re-intregrasaun labarik sira ba eskola, F-FCJ serbisu hamutuk ho Espoza Prezidente Repúblika, Cídália Mouzinho Nobre Lopez Guterres liuhusi Gabinete Apoiu Atividade Conjuje-Prezidénsia Repúblika (GAAC-PR sigla Portugeza).

“Tinan ida-ne’e iha labarik hamutuk 35 maka uma-mahon re-integra ba eskola, ho tipu kazu oioin, balun abandona, balun inan-aman laiha kapasidade finanseiru atu hola farda, kadernu no fasilidade ba eskola nian, no sira-ne’e maka tama hotu iha pakote F-FCJ ho GAAC-PR ne’e”, nia hatutan.

Domingas hatutan, F-FCJ rasik submete ona proposta foun ba GAAC-PR nune’e bele haree kontinuasaun husi programa re-integrasaun labarik na’in-35 ba eskola sira, tanba tinan ne’e sira re-integra duni ona, maibé fundu maka seidauk iha atu selu sira-nia mensalidade eskola nian.

“Oras ne’e labarik sira eskola ona no ami depende ba GAAC-PR atubele apoiu ami hodi selu. Se GAAC-PR rasik maka laiha fundu ba ida-ne’e, entaun ami tenke hapara duni labarik hirak-ne’e, tanba ami mós kbiit la to’o atu selu. Ha’u iha esperansa katak GAAC-PR liuhusi espoza Prezidente Repúblika sei fornese fundu ruma ba labarik hirak-ne’e”, nia informa.

Nia mós esplika liután katak, iha tinan 2019, uma-mahon ne’e atende labarik hamutuk 72, maibé sira hela depende ba kazu.

“Sira-nia kazu ne’ebé tama iha ne’e liuhusi Ministériu Públiku to’o Tribunál. Kazu ne’e, bainhira suspeita ba komarka ona, entaun labarik entrega fali ba família. Maibé, iha balun la fila tanba família rasik la simu fali sira-nia oan. Entaun, sira-ne’e maka tama hotu iha pakote ida 35 ne’e, atu ami buka oinsá re-integra filafali ba eskola, ho apoiu husi GAAC-PR”, Domingas haklaken.

Entretantu, labarik sira na’in-35 ne’ebé F-FCJ ho GAAC-PR konsege re-integra ba eskola sira iha tinan 2019 maka hanesan Eskola Primária Ailok, Eskola Primária Tibar, Eskola Primária Kamea, Eskola Primária MUI, eskola Primária Aituri-Laran, Eskola Pré Sekundária Kasait, Eskola Pré Sekundária númeru 6 Becora, Eskola Pré Sekundária númeru 3 Becora, Eskola Pré Sekundária Nicolau Lobato, Eskola Pré Sekundária Railaco, Eskola Pré Sekundária Nobel da Páz, Eskola Sekundáriu Nobel da Páz, Eskola Sekundáriu Nobel da Páz, Eskola Sekundáriu 5 de Maio, Eskola Sekundáriu númeru 4 Balide no Eskola Téknika Vokasionál Becora.

Uma-mahon ne’e harii husi Cipriano Freitas iha tinan 1997 no atuál diretór maka Damião da Silva Pedreira.

Funsionáriu sira ne’ebé serbisu ba uma-mahon ne’e hamutuk na’in-16 inklui seguransa, cleaner no kuzineira.

Funsionáriu sira maioria mai husi juventude ne’ebé hetan formasaun iha komunidade Don Bosco, madre saleziana no padre sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here