Diretór Jerál AA/Alfándega, José António Fátima Abílio. Imajen TATOLI/Egas Cristovão

DILI, 03 fevereiru 2021 (TATOLI)–Autoridade Aduaneira (AA)/Alfándega fó sasin katak ho utilizasaun sistema ASYCUDA World durante ne’e bele redús tempu ba prosesamentu dokumentu merkadoria (esportasaun no importasaun).

Tuir Diretór Jerál AA/Alfándega, José António Fátima Abílio, haree fali submisaun Deklarasaun Aduaneira Únika (DAU) husi despaixante sira katak kuandu sira kompleta ona rekezitu maka broker sira hahú submisaun iha sistema.

“Husi prosesu ita halo komparasaun iha tinan 2018 iha loron 5,47, iha tinan 2019 iha loron 4.68, no 2020 iha loron 3.45, signifika katak hafoin uza sistema ASYCUDA World, tempu ne’e komesa tun. Ida-ne’e hatudu katak ajénsia relevante sira tenke impelementa sistema ne’e, nune’e bele aselera mós prosesu dezalfandegamentu, tanba la’ós kabe ba kompeténsia Alfándega nian de’it maibé iha interligasaun ho instituisaun relevante,” Diretór Jerál José António, dehan, foin lalais iha salaun Ministériu Finansa, Aitarak-laran.

Notísia relevante: Governu Lansa Ona Sistema Asycuda World Iha APORTIL

Responsável ne’e nota katak durante implementasaun plataforma ne’e, iha neseidade atu envolve mós ajénsia relevante sira seluk, tanba durante utilizasaun iha mudansa signifikativa ba fasilidade komérsiu liuhosi prosesamentu dokumentu pagamentu, libertasaun merkadoria, inklui redusaun rempu ba prosesu dezalfandegamentu.

“Ita bele haree study timer, ami haree husi parte rua hanesan submisaun dokumentu husi ajénsia sira to’o iha prosesu sai husi portu ne’ebé mak envolve ajénsia relevante sira hanesan Diresaun Nasionál Kuarentena no Bioseguransa, Autoridade Portuáriu Timor-Leste (APORTIL)  no seluk tan, tanba iha prosesu ne’e presiza kompleta dokumentu balun hanesan lisensa, autorizasaun, atubele hatama importasaun,”nia haktuir.

Oras ne’e iha postu sira hanesan fronteira terrestre no aeroportu bele prosesa DAU imediatamentu no la presiza to’o iha edifísiu sentrál.

“Bainhira mai edifísiu sentrál só konsentra ba prosesamentu sira ne’ebé mak liuhosi portu tanba durante ne’e volume husi portu aas,” nia hatutan.

Antes ne’e, Konsellu Ministru aprova sistema ASYCUDA World hanesan plataforma eletrónika Timor-Leste nian ba implementasaun janela únika liuhosi rezolusaun Governu númeru 24/2017.

Sistema ne’e hanesan plataforma eletrónika ba Timor-Leste no hanesan janela únika ne’ebé bele ajuda Alfándega ba transasaun uza meiu husi aeroportu bainhira hatama merkadoria.

Biban ne’e, Diretór Jerál Alfándega rekomenda atu instituisaun relevante hanesan Diresaun Nasionál Kuarentena no Bioseguransa, Ministériu Saúde, Ministériu Transporte no Komunikasaun, Ministériu Indústria, Komérsiu no Indústria, APORTIL, TradeInveste, Serbisu Migrasaun, Sekretáriu Estadu Ambiente, no mós ajénsia finanseira sirabele utiliza sistema ne’e atu hafasil serbisu.

Iha janeiru 2013, Ministériu Finansa (MF) asina akordu ho nited National Conference on Trade and Development (UNTACD) hodi atualiza sistema ASYCUDA++ ba ASYCUDA World.

Tanba ne’e, hahú dezenvolve iha tinan 2014 no halo migrasaun ba dadus, konfigurasaun ba artigu sira tuir dekretu-lei kódigu aduaneiru no mós lei sira seluk, konfigura ho sistema armonizadu, alerta mós kona-ba atrazu balun ne’ebé tuir loloos importadór tenke kumpre.

Inísiu implementasaun iha fin tinan 2015 no iha agustu 2017, konsege alkansa 100% dokumentu tranzasaun internasionál sira ba impotasaun-esportasaun liuhosi dijitalizasaun inklui submisaun online.

Iha implementasaun ASYCUDA World ne’e rasik, hahú envolve ofisiál ba prosesamentu DAU.

Atualmente plataforma online ne’e implementa iha postu aduaneira sira hotu hanesan Aeroportu, fronteira terrestre, eseptu Rejiaun Administrativa Espesiál Oé-cusse Ambeno (RAEOA) no Ataúro.

Iha tinan 2015, MF entrega servisu aduaneira ba RAEOA, enkuantu negosiasaun ne’e la’o hela entre Governu sentrál no autoridade RAEOA hodi bele uza mós sistema ASYCUDA World.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here