Governu liuhosi Ministériu Transporte no Komunikasaun, ohin lansa sistema Asycuda World iha APORTIL. Foto Júlia Chatarina

DILI (TATOLI) – Governu liuhosi Ministériu Transporte no Komunikasaun (MTK) lansa sistema automatizadu ba dadus alfándega (Asycuda World -The Automated System for Customs Data) iha Autoridade Portuáriu Timor-Leste (APORTIL) hodi fasilita servisu importasaun no esportasaun sira iha portu.

Asycuda world, sistema ne’ebé Timor-Leste uza hodi bele prosesa sasan ne’ebé ita importa no esporta ba rai liur. Sistema ne’e importante tebes, tanba integradu ba jestaun komérsiu nian. Ohin ita halo lansamentu iha APORTIL, autoridade ne’e mak hahú prosesu importasaun ka esportasaun sasan”, tenik Koordenadora Komisaun Reforma Fiskál, Fernanda Borges, iha APORTIL, ohin.

Fernanda Borges hatutan sistema ne’e monta atu funsionáriu sira ne’ebé servisu iha APORTIL bele uza hodi simu manifestu husi kompañia ró sira, kargu ne’ebé mak iha manifestu ne’e nia laran, kontentór hira, data, kompañia saida, nune’e alfándega bele prosesa sasan ne’ebé tama.

Nia haktuir sistema ne’e kompañia estranjeiru liuhosi ró ahi bele haruka manifestu ho elektronikamente husi sistema, nune’e portu bele halo jestaun iha kontentór sira hamutuk ho alfándega iha forma integrada.

Eis-deputada ne’e haktuir agora dadauk APORTIL servisu manuál, tenke uza spreadsheet  (tabela ou gráfiku iha programa excell), kontentór sai mós defísil atu detekta, tenke ba cek pessoalmente, tanba ne’e halo kleur no atrazu iha libertasaun kontentór sira no bele iha dúvida katak kontentór iha ne’e ou laiha no sai mós kustu boot ba interviniente, kompañia ró ahi, no importadór sira tanba kleur liu.

“Ho sistema ne’e, APORTIL bele jere servisu sira ne’e ho di’ak liután, hetan dadus ne’ebé integridade no loos, tanba ita labele muda naran-naran de’it. Sasan mai, sistema simu, kompila, analiza, tau hamutuk no ita programa sistema atu fó informasaun lalais atu APORTIL bele atua lalais hamutuk ho alfándega”, katak.

Nune’e, nia hein sei fó benifísiu ba importadór sira, tanba sei reduz kustu, tempu no merkadoria bele sai lalais liu ba merkadu, nune’e povu bele hetan sasan fásil no lais liu.

Entretantu, sistema ne’e estabelese ona iha alfándega Batugade, Suai no tuir planu tempu badak sei implementa iha Oekusi, nune’e sistema bele kapta informasaun tomak. Alende ne’e broker sira uza ona, aeroportu Dili mós uza no ba oin aeroportu Suai sei uza.

Fernanda hatete hafoin lansamentu iha APORTIL, sei lansa tan iha kuarentina, nune’e servisu ne’e bele integradu ho alfándega atu fasilita komérsiu no reduz tempu atu sistema ne’e tama no kapta dadus dala ida no hotu-hotu bele asesu.

“Servisu ne’e di’ak ba ita no ba nasaun, tanba ho ida ne’e ita bele kolleta reseita di’ak liután, tanba ita presiza reseita doméstika barak liu, alfándega mak fatin kobra reseita barak liu iha Timor-Leste”, katak.

Nia katak tan kuandu sasan tama iha portu liu montante US$300 merkadoria, tenke selu impostu mak alfándega prosesa.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here