Komandante Jerál PNTL,, Komísariu Faustino da Costa. Imajen TATOLI/Egas Cristovão

DILI, 03 fevereiru 2021 (TATOLI)-Komandante Jerál Polísia Nasionál Timor-Leste (PNTL), Komisáriu Faustino da Costa, afirma Polísia sei aplika medida rigorozu hodi kriminaliza abitante ne’ebé kontinua haku’ur  ilegál hosi Atambua-Indonézia mai territóriu Timor-Leste.

Komisáriu Faustino da Costa, subliña PNTL sei kriminaliza kualkér sidadaun tama ilegál hodi asegura implementasaun  Estadu Emerjénsia (EE) faze da-sanulu ba loron-30 ne’ebé abordajen ba territóriu nasionál tomak no vigora iha tuku 00:00 loron 02 fevereiru  to’o tuku 23:59, 03 marsu 2021.

“Agora sei iha atividade ilegál sira, ita sei kriminaliza hodi halo asaun kriminál detein sidadaun sira ne’e,” Komisáriu Faustino da Costa afirma ba jornalista iha Sentru Formasaun Polísia, Comoro, Dili, kuarta ne’e.

Notísia Relevante : Timoroan na’in rua pozitivu COVID-19, pasiente aumenta ba 24

Nia dehan, Governu rasik liuhosi Ministériu Saúde mós la fó ona auto kuarentena ba sidadaun hotu-hotu, exeptu diplomata sira.

Ba abitante sira ne’ebé tama ilegál, nia afirma tan, Unidade Patrullamentu Fronteira (UPF) sei detein depois aprezenta ba fatin kuarentena remata loron 14 sei prosesa sira-nia kazu ba Ministériu Públiku.

Abitante sira ne’e PNTL sei kriminaliza tuir dekretu Governu Nu. 3/2021, artigu 13 no 14, ne’ebé ko’alia kona-ba bainhira sidadaun sira la kumpre no la halo tuir orden no instrusaun hosi autoridade kompetente ba aplikasaun norma hosi diploma ida-ne’e, infratór sei hetan responsabilidade kriminál tuir Kódigu Penál Timor-Leste.

Artigu 14 abitante estranjeiru ne’ebé la kumpre medida no la respeita orden no instrusaun hosi autoridade kompetente ba aplikasaun norma sira hosi diploma ida ne’e sei komunika kedas ba Servisu Migrasaun.

Komisáriu Faustino da Costa, alerta ba sidadaun hotu-hotu atu koopera hodi evita aktu ilegál hodi prevene propagasaun surtu COVID-19 hosi nasaun viziñu mai Timor-Leste.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here