Ekipa Timor Port hasoru malu ho Primeiru-Ministru, Taur Matan Ruak, iha Palásiu Governu, tersa (02/02). Imajen TATOLI/Egas Cristovão

DILI, 02 fevereiru 2021 (TATOLI)-Empreza Timor Port S.A, planeia atu halo rekrutamentu ba timor-oan hamutuk 300-resin atu halo serbisu iha Portu Tibar bainhira halo operasionalizasaun iha tinan 2022.

Iha loron 30 agostu 2018, Primeiru-Ministru (PM), Taur Matan Ruak halo lansamentu ba konstrusaun Portu Tibar, no tuir planu finaliza konstrusaun iha maiu 2022.

“Ami mós iha tinan ne’e planu atu halo rekrutamentu ba ema entre 300 to’o 350, atu ema sira ne’e aban bainrua halo serbisu ka apoia atividade portu ne’e,” Diretór Ezekutivu Timor Port S.A, Rafael Ribeiro, informa hafoin sorumutuk ho Xefe Governu iha Pálasiu Governu, tersa ne’e.

Notísia relevante: Governu Entrega Sertifikadu Investidór Ba Timor Port S.A Ba Konstrusaun Portu Tibar

Empreza ne’e hahú elabora atu publika rekrutamentu  atu timor-oan sira bele konkorre, hafoin tuir formasaun ba atividade ne’ebé sei halo iha portu ne’e.

Diretór Ezekutivu Timor Port S.A, Rafael Ribeiro. Imajen TATOLI/Egas Cristovão

“Ami sei publika buat barak ba públiku atu ema hotu bele komprende tanba buat barak sei diferente entre portu agora ho Portu Tibar iha futuru,” nia hatutan.

Rekrutamentu ne’e ba traballadór sira ne’ebé sei halo operasionalizasaun ba Portu Tibár inklui ekipa tékniku no espesialista sira hamutuk 100 sei mai husi Xina.

“Presiza traballadór ba operasionalizasaun tanba previstu kais rua ho metru 630, bele simu kontetór 8700.000 iha tinan ida nian laran,” nia hatutan.

Konstrsaun Portu Tibar, lokaliza iha kilómetru 10 husi Oeste Dili, iha Baía Tibar, munísipiu Liquiçá, ne’ebé hanesan infraestutura prioritária ne’ebé indetifika ona iha Planu Estratéjiku Dezenvolvimentu Nasionál (PED) 2011-2030.

Projetu ne’e hanesan konstrusaun nível internasionál, ne’ebé ezekuta liuhosi Timor-Port S.A ho modalidade Parseira Públika Privada (PPP), ne’ebé halo konsórsiu ho Bolloré no Governu Timor-Leste.

Ba konstrusaun ne’e, Governu aloka millaun $130, enkuantu Timor Port no Bolloré hamutuk millaun $140, totál millaun $270 ba faze inísiu.

Enkuantu, totál investimentu orsamentu ba Portu Tibar to’o tinan 30 ho valór milaun $500.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here