DILI, 12 jullu 2019 (TATOLI) – Governu Timor-Leste liuhosi Ministru Estadu Prezidénsia Konsellu no Ministru Koordenadór Asuntu Ekonómiku ein ezersísiu, Agio Pereira entrega sertifikadu investidór ba Timor Port S.A ba konstrusaun Portu Tibar.

Iha biban hanesan, entrega mós emenda dahuluk sertifikadu investidór ba empreza Gota bebida no alimentu, deklarasaun benifísiu ba empreza “Ami Hari no Central Moris”.

Ministru Agio iha ninia diskursu hateten, investedór ba Estadu timoroan hanesan papel importante tanba hanesan parseiru dezenvolvimentu hodi tulun dezenvolve ekonomia nasaun, maske iha difikuldade iha prosesu ne’e rasik.

“Tinan ida ne’e ha´u hetan esperiénsia kona-ba difikuldade prosesu atu emite sertidaun benifísiu no sertifikadu investidór. Iha difikuldade oioin hanesan difikuldade legál, lejizlasaun bele muda, no intrepretasaun lei ne’e rasik,” tenik Ministru Agio iha Palásiu Governu, sesta (12/07/2019).

Nia hatutan: “Advogadu balun intrepreta tuir nia entendimentu no iha polítika hetan konfuzaun tanba ita tenke tuir prosesu no iha nia implikasaun legál”.

Governante ne’e akresenta, maske hetan difikuldade maibé investidór sira iha responsabilidade no hatudu vontade di´ak hodi halo investimentu. “Ita-boot sira mós investe ona iha postu traballu no ita-boot sira hatudu imajen Estadu Timor-Leste ba li´ur hodi investidór sira bele fó konfiansa no hakarak investe iha Timor-Leste. Prosesu ne’e atrazu tanba sirkuntánsia barak ne’ebé Governu rasik labele kontrolu, fatór sira ne’e mak nia efeitu kombinadu hodi halo atrazu”.

Iha fatin hanesan, Diretór Ezekutivu TradeInvest Timor-Leste, Arcanjo da Silva informa atribuisaun sertifikadu investidór ba Timor Port S.A hodi konstroe Portu Tibar hanesan proposta dentru mekanizmu investimentu Parseria Públiku Privadu (PPP) ho investimentu millaun $318, sertifikadu emenda ba Gota ne’ebé loloos investe iha Liquiça maibé muda lokál investimentu mai Díli, nune’e sira lakon sira-nia benefísiu(que devia hetan benefísiu) durante tinan ualu maibé tenke reduz tuir Lei ba tinan lima de´it tanba muda lokál no mós investimentu empreza “Central Moris no Ami Hari”.

Kompañia Gota harii fábrika bee iha Díli hanesan indústria transformadora, “Central Moris” investe iha pekuária no “Ami Hari” iha setór ida importante.

Diretór Arcanjo esplika, prosesu naruk tanba prosesu hotu antes atu aprova iha órgaun tutela, Ministériu Koordenadór Asuntu Ekonómiku (MKAE) aprova lori tinan naruk uitoan tanba prosesu la’ós deit hakru´uk ba lei investimentu privadu no Dekretu kona-ba regulamentu no prosedimentu privadu, maibé tenke tetu no konsidera sira seluk hanesan kódigu laborál, lei imigrasaun, lei ambiente, lei tributária no lei seluk ne’ebé relevante ba investimentu iha Timor-Leste.

Enkuantu, Chairman ka Ezekutivu Timor Port SA, Rafael Ribeiro­­ sente orgullu tanba Governu fó fiar ba empreza ne’e  atu halo investimentu iha área estratéjika ne’ebé mak sei fó benifísiu ba ekonomia nasaun iha futuru.

“Ho investimentu ida ne’e hatudu katak kompañia fó fiar ba povu no nasaun ida ne’e hodi la’o ba oin no sertifikadu investimentu ida ne’e hatudu katak Governu iha comitment (komprimísiu) no interese aas hodi apoiu, fasilita no proteje investidór ne’ebé mak atu mai investe iha Timor-Leste,” nia dehan.

Notísia Relevante: Responsável Konstrusaun Portu Tibar Atualiza Progresu Serbisu Ba Governu

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here