Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 02 fevereiru 2021 (TATOLI)- Presidente Repúblika, Francisco Guterres “Lú Olo”, husu ba komandante no membru FALINTIL-Forsa Defeza Timor-Leste (F-FDTL) sira atu prepara instituisaun ba dezafiu foun sira ne’ebé nasaun enfrenta.

Xefe Estadu afirma mensajen ne’e liuhosi Xefe Kaza Sivíl, Francisco Maria de Vasconcellos iha selebrasaun aniversáriu  transformasaun FALINTIL ba F-FDTL ba dala-20 iha Kuartél Jenerál F-FDTL, Fatuhada, Dili.

Notísia Relevante : Lere promete eleva kapasidade institusionál no moris di’ak membru F-FDTL sira

Lú Olo afirma mensajen xave tolu ne’ebé membru F-FDTL sira presiza implementa iha sira-nia servisu mak hanesan:

  1. Kontinua atu reforma estrutura superiór Defeza Nasionál no Forsas Armadas nian, liuliu prepara dokumentasaun estratéjiku ne’ebé estruturante.
  2. Adapta no prepara Instituisaun ba dezafiu foun sira-ne’ebé nasaun hasoru, ne’ebé sei ezije halo jestaun ba F-FDTL nia rekursus umanus sai efikás, efisiente no rasionál liután.
  3. Hamosu konseitu servisu militár foun ida ne’ebé sei lori mudansa importante liu ida intermus kuantidade no kualidade no bele fó impaktu makaas liu ba F-FDTL nia estrutura no vida institusionál tanba konsidera nu’udar mudansa kle’an ida ba F-FDTL nia kultura no tradisaun liga ho servisu militár.

Lú Olo hatutan, profesionaliza Forsas Armadas Timor-Leste, ne’e desizaun polítika ida ne’ebé iha ninia vantajen no dezvantajen. Mudansa sira ne’e, iha podér polítiku nia liman, ezije maturidade no konxiénsia polítika kona-ba saida mak serve di’ak liután nasaun nia interese sira.

Aprovasaun ba regulamentu foun hosi Lei Servisu Militár nian tenke liu prosesu tranzisaun ida ne’ebé naruk. Tanba ne’e maka, karik TL la investe iha infraestrutura bázika, ekipamentu no armamentu, F-FDTL nia operasionalidade no kapasidade atu hala’o sira nia misaun sei limitadu tebes.

Komandante Supremu sente orgullu tebes ho ninia Forsas Armadas. Nasaun no povu Timoroan hatene sira bele konta nafatin sira ho votu esperansa iha futuru no ho sentidu rekoñesimentu no gratidaun ba serbisu ne’ebé halo ona.

“Ha’u nu’udar imi nia Komandante Supremu, fó laran manas ba imi atu serbí nafatin ita-nia rai inan ho profisionalizmu no dedikasaun, hanesan uluk. Ha’u fiar katak imi sei kontribui ba tane aas FALINTIL-FDTL no Timor-Leste nia naran kmanek,” PR Lú Olo hateten liuhosi mensajen ne’e.

Lú Olo rekoñese tinan ne’e ida susar tebes ba Timor-Leste no mundu tomak ne’ebé enfrenta problema ameasa globál surtu COVID-19.

Timor-Leste kontinua  halo esforsu ho maneira relevante no konstrutivu, kona-ba asuntu lubuk ida ne’ebé hakarak haree ba evolusaun preokupante hosi pandemia ne’ebé hamosu hosi Coronavirus foun, no medida ezekusaun ne’ebé Governu aprova ona ba Estadu Emerjénsia hodi prevene no kontrola COVID-19 atu la hada’et iha Timor-Leste, maka ba tinan ida ne’e loron FALINTIL-Forsa Defeza Timor-Leste labele komemora hanesan tinan sira uluk nian.

PR Lú Olo aproveita selebra aniversáriu F-FDTL hato’o mós mensajen insentivu ba sira hotu ne’ebé envolve iha instituisaun ne’e  hanesan, militár no sivíl, feto ho mane, tanba sira nia dedikasaun tomak hodi serbí ho di’ak rai doben no Timoroan.

Sentimentu ida ne’e mosu tanba haree maneira oinsá Forsas Armadas durante ne’e hala’o sira nia misaun, sira nia kontribuisaun ba hametin ambiente koezaun, estabilidade no seguransa, liuhosi unidade no dixiplina ne’ebé sira rasik kaer metin, atu tane valór aas sira ne’ebé sai nu’udar matadalan ba TL  nia ezisténsia koletiva nu’udar nasaun Independente.

PR Lú Olo dezafia povu tomak atu korajen enfrenta  ameasa surtu COVID-19 no serbisu hamutuk ho entidade seguransa sira hodi  implementa no kumpre regra Estadu Emerjénsia sai hanesan justifikasaun ba Forsas Armadas sira-nia intervensaun ne’ebé hatuur momoos iha lei.

Rejime legál estadu emerjénsia nian fó dalan ba militár sira atu fó apoiu ba autoridade sivíl sira no forsas seguransa iha períodu exesaun ida ne’e, durante ne’ebé Konsellu Superiór Defeza Nasionál funsiona ho permanente.

Nia hatutan, haree hosi dimensaun operasionál mak karakteriza no haketak Forsas Armadas hosi forsa sira seluk. Maibé, aleinde dimensaun operasionál ida-ne’e, iha mós dimensaun apoiu ba autoridade sivíl sira, ne’ebé fó dalan ba Forsas Armadas atu tulun instituisaun sira seluk hametin seguransa iha rai-laran ka fó apoiu ba komunidade sira nia dezenvolvimentu no moris di’ak.

Forsas Armadas sira-nia rekursus umanus no material, sira-nia esperiénsia, prontidaun, kapasidade atu hatán kedas, sira-nia kultura organizasionál no kapasidade atu adapta aan ba situasaun ne’ebé iha, mak hanesan elementu importante tebes hosi Forsas Armadas sira-nia atuasaun ne’ebé nasaun tenke kaer metin.

Apoiu ne’ebé F-FDTL durante ne’e fó ba operasaun prevensaun no metigasaun COVID-19, bazeia ba pedidu hosi forsas no servisu seguransa no autoridade saúde sira rasik, hodi hala’o knaar oioin iha terrenu, inklui hametin kontrolu no seguransa iha fronteira rai-maran no fronteira tasi ho Indonézia, fó apoiu ba programa sensibilizasaun ba komunidade sira kona-ba medida prevensaun no distansiamentu sosiál, lori suspeitu infesaun ba fatin izolamentu no tau matan ba seguransa iha fatin sira-ne’e, hala’o projetu enjeñaria hanesan harii filafali no hadi’a fasilidade saúde/sanitária, prepara no asegura seguransa iha fatin izolamentu no kuarentena, no fahe ai-moruk ba komunidade sira.

F-FDTL nia empeñu ne’e konta ho apoiu hosi nasaun belun barak ne’ebé iha momentu susar ba Timor-Leste, kontribui ona atu F-FDTL bele prepara aan no partisipa iha luta hasoru COVID-19.

Jornalista   : Eugénio Pereira

Editór        : Francisco Simões  

HAKEREK NO HATÁN

Please enter your comment!
Please enter your name here