Xefe Estadu Maiór Jenerál F-FDTL, Tenente Jenerál Lere Anan Timur. Imajen Tatoli/Antonio Goncalves

DILI, 02 fevereiru 2021 (TATOLI)- Xefe Estadu Majór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, promote eleva kapasidade institusionál no moris di’ak membru F-FDTL sira nian.

Liuhosi serimónia aniversáriu transformasaun FALINTIL ba F-FDTL ba dala-20, tersa ne’e, iha Kuartél Jenerál F-FDTL, Fatuhada, Dili, Major Jenerál Lere Anan Timur, afirma nia parte mós  halo esforsu atu eleva koñesimentu membru F-FDTL sira nian no buka aposta investe iha fasilidade no ekipamentu ne’ebé adekuadu ba F-FDTL.

“Tinan ne’e ba oin, ita buka atu mellora kondisaun ba ita-nia forsa armada nian,”  hateten Lere Anan Timur.

Lere dehan, selebrasaun tinan ne’e marka diferensa uitoan no la iha promosaun diviza ba membru no komandante sira, tanba Timor-Leste implementa hela Estadu Emerjénsia da-sanulu hodi husu atensaun ba entidade Estadu no abitante sira atu prevene aan hosi COVID-19.

Selebrasaun tinan 20 FALINTIL transforma ba F-FDTL,  tuir Lere Anan Timur, la’ós fasil, maibé F-FDTL sai nu’udar instituisaun ida ne’ebé joven no iha ona konsiénsia atu la’o ba ho profisionál no dixiplina.

Lere hato’o agradese mós ba lideransa Kay Rala Xanana Gusmão no Taur Matan Ruak ne’ebé konsege halo mudansa hodi transforsa FALINTIL  ba F-FDTL hahú kedas iha Aileu iha tinan 2001.

“Ha’u agradese ba transformasaun ne’e la’ós fasil. Mezmu la iha kondisaun, maibé sira iha espíritu nasionalizmu hodi motiva joven sira fó susesu ba planu ne’ebé Komandu FALINTIL iha,” Lere hateten.

Nia dehan, veteranu FALINTIL barak katuas ona, maibé sira sei kontinua fahe nafatin sira-nia espíritu ba foin-sa’e sira hodi tane no lori F-FDTL ba oin ho susesu.

F-FDTL ohin loron kria ona kooperasaun defeza militár ho nasaun barak hodi fó susesu ba F-FDTL iha tinan 20 nian laran hodi foku ba prosesu dezenvolvimentu infraestrutura no dezenvolvimentu rekursu umanu ba membru sira.

Nia dehan, ko’alia kona-ba profisionalizmu la’ós forma ema de’it, maibé ko’alia mós kona-ba prepara kondisaun infraestrutura hodi fó susesu ba dezenvolvimentu F-FDTL.

Lere husu ba komandante no membru F-FDTL sira atu kontinua kaer metin prinsípiu luta eroi FALINTIL sira nian hodi hanoin ida de’it no kria unidade metin no dixiplina hodi fiar ba ierarkia komandu F-FDTL ida nia orden.

“Hakraik aan, hatene rona ema, no hatene aprende hosi ema ne’e hanesan kultura ida hodi kontribui ba dezenvolvimentu nasionál,” nia apela.

Xefe Estadu F-FDTL ne’e tatoli tan, iha tinan 20 ba kotuk, F-FDTL hasoru problema oin-oin ne’ebé Organizasaun Nasoins Unidas (ONU) rasik kestiona, maibé Timor-Leste marka ninia istória diferensa ho forsa armada nasaun seluk nian.

Iha parte seluk, Lere rekoñese ohin loron Komandu F-FDTL sei kontinua moris iha difikuldade oin-oin, tanba tenke adapta aan iha mundu globalizasaun ne’ebé ezije ema hotu atu kontribui hodi fó susesu ba F-FDTL.

Harii bairru militár iha Dili no Baucau

Iha parte seluk, Majór Jenerál Lere Anan Timur, dezafia Ministériu Defeza hodi bele implementa ona planu harii tan bairru militár foun iha área Hera no Sentru Formasaun Terrenu, Baucau.

Lere dehan, bairru militár ne’e Governu harii ho objetivu hodi halibur família militár sira bele hela iha fatin ne’ebé fasil bele kontrola no halo sira-nia moris unidade, liu-liu feto no mane labele fahe malu.

Serimónia aniversáriu transformasaun FALINTIL ba F-FDTL ne’e partisipa hosi, Prezidente Parlamentu Nasionál, Aniceto Guterres, Prezidente Tribunál Rekursu, Deolindo dos Santos, Vise-Primeiru Ministru, José Reis, Xefe Kaza Sivíl Prezidénsia Repúblika, Francisco Maria de Vasconcellos, adidu militár, korpu diplomátiku no konvidadu importante seluk tan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here