Diretora Ezekutiva FOKUPERS, Maria Fátima Perreira Guterres (liman karuk), no Staff Asisténsia Vítima iha fokupers, Judit Ribeiro da Conceição (liman kuana). Imajen Tatoli/Osória Marques.

DILI, 02 fevereiru 2021 (TATOLI)—Diretora Ezekutiva FOKUPERS, Maria Fátima Perreira Guterres, hateten limitasaun ambiente mak hamosu labarik dalan ninin maibé liafuan labarik dalan ninin ne’e eziste iha nasaun seluk la’ós iha Timor-Leste.

Notísia Relevante: Iha Timor-Leste laiha “Labarik Dalan Ninin”

“Ha’u hakarak hateten labarik dalan ninin ne’e laiha, tanba limitasaun hosi ambiente ruma mak ema bolu labarik dalan ninin. Maibé, tuir loloos ne’e labarik dalan ninin ne’e eziste iha nasaun seluk, la’ós iha Timor-Leste,” Maria Fátima Perreira Guterres hateten ba Agência TATOLI relasional ho komemorasaun Loron Mundiál Labarik Dalan Ninin ne’ebe mundu selebra iha kada 31 janeiru iha nia knaar fatin, Faról, Dili, tersa ne’e.

Diretora ne’e hatutan, maske labarik ne’e ki’ak ba ka uma aat ba mós nia kontinua iha família no uma rasik. Tanba ne’e, nia dehan, labarik dalan ninin iha Timor ne’e laiha.

Entretantu Staff Asisténsia Vítima iha FOKUPERS, Judit Ribeiro da Conceição,  hateten liafuan labarik dalan ninin la merese atu temi nune’e tanba labarik sira-ne’e iha família no iha uma, mezmu labarik ne’e la’o iha dalan ninin.

“Ita la merese atu hatete liafuan ida ‘labarik dalan ninin’ ba ita-nia alin sira, tanba sira-ne’e maihosi família ida. Tanba de’it situasaun modernu mak muda asaun sira-ne’e akontese,” nia dehan.

Tuir nia, labarik iha ambiénte agora ne’e la’ós ona labarik dalan ninin maibé haree ambiénte ne’ebé di’ak hanesan asesu ba edukasaun. Nia reforsa katak labarik sira iha dalan ninin maibé sira mós iha ambiénte aprende nian hanesan asesu ba edukasaun, bainhira tempu livre mak labarik sira-ne’e mós hakarak espresa sira-nia aan.

Judit hateten, labarik sira halo negósiu infantil karik mós família ladún kria kondisaun di’ak ba labarik sira entaun sira mós presiza buka livre. Tanba ne’e, Governu presiza prepara fatin seguru ida ba labarik sira hodi bele esplora sira-nia aan.

“Tanba ne’e, ita labele hanoin labarik dalan ninin, buat ida ne’ebé ladi’ak. Sira mós presiza ambiente furak hanesan jardin sira iha Dili laran,” Judit hateten.

Nia dehan, jardin ne’ebé Governu prepara ona tuir loloos labarik sira mak uza hodi espresa sira-nia aan no livre atu halo atividade labarik nian iha jardin. Governu tenke kria kondisaun ne’ebé di’ak no kria mós regra ba ema boot sira bainhira uza jardin.

“Jardin hirak ne’ebé iha Dili ita-nia Governu prepara ba labarik la’ós ba ema boot sira hodi limita fali labarik sira-nia ransu. Tanba presiza kria regra rigorozu ida katak jardin ne’e ba labarik sira,” nia dehan

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here