Vise-Ministru Interiór, António Armindo. Imajen Tatoli/ Egas Cristovao

DILI, 02 fevereiru 2021 (TATOLI)-Vise-Ministru Interiór, António Armindo, hateten Governu no nia parte hein de’it desizaun ka notifikasaun  hosi Ministériu Públiku kona-ba keixa ne’ebé kompañia R2M hato’o ona ba iha Polísia Sientífika Investigasaun Kriminál (PCIC), foin lalais ne’e.

Notísia Relevante : R2M halo keixa ba PCIC kontra Vise-Ministru António Armindo

“Kona-ba keixa hosi kompañia R2M, ha’u hanoin iha nasaun demokrátiku sira, kuandu sidadaun sira sente prejudikadu sira bele halo keixa para buka lia loos. Ita iha akordu ida para kuandu sira devolve osan Estadu nian maka ita sei fó fali sira nia sasán. Maibé, tanba keixa ne’e lao ona hanesan imi haree R2M lori Governu ba kesar iha PCIC  entaun ita hein notifikasaun hosi Ministériu Públiku,” Vise-Ministru Interiór, António Armindo, hateten iha komunikadu imprensa ne’ebé  Agência TATOLI asesu tersa ne’e.

Komunikadu ne’e mensiona katak antes ne’e Diretór Jerál Servisu Migrasaun, Superintendente Asistente Polísia, Luis Barreto, informa kompañia R2M halo falsifikasaun no manipulasaun iha fornesimentu mákina impresora vistu nian, tanba tuir kontratu Servisu Migrasaun husu mákina impresora ho marka Dillteta ne’ebé própriu ba imprime vistu sira ne’e, maibé kompañia R2M fornese fali mákina impresora seluk ho marka EPSON.

Liuhosi enkontru ho Primeiru-Ministru (PM), Taur Matan Ruak, iha Palásiu Governu, Vise-Ministru Interior, Antonio Armindo, atualiza  mós serbisu Ministériu Interior nian ba Xefe Governu liu-liu kona-ba importánsia husi servisu ne’ebé alkansa ona hodi kontinua fo susesu ba programa ministériu nian ne’ebé determina ona.

Liu-liu atualiza servisu ne’ebé durante ne’e halo ona, liga ba situasaun seguransa rai-laran no mós planu servisu ne’ebé atu halo iha semana oin, liu-liu kona-ba postu foun ne’ebé atu halo inklui postu sira ne’ebé  hetan husi doadores sira.

Nia hateten, oras ne’e doadór sira hosi embaixada Australia besik konklui ona konstrusaun ba postu mobile ne’ebé atu monta iha fronteira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here