Primeiru-Ministru, Taur Matan Ruak, konvoka reuniaun ho Diretór Ezekutivu CIGC, Brigadeiru Jenerál, João Miranda “Aluk” no Diretór IDN, Capitão-de-Mar-e-Guerra, Donaciano da Costa Gomes ‘Pedro Klamar Fuik’, hamutuk ho ekipa téknika, iha Palásiu Governu, segunda (01/02), Imajen TATOLI/Egas Cristovão

DILI, 01 fevereiru 2021 (TATOLI)–Primeiru-Ministru (PM), Taur Matan Ruak, konvoka enkontru ho Diretór Ezekutivu Sentru Integradu Jestaun Krize (CIGC, sigla portugés), João Miranda ‘Aluk’ no Diretór Institutu Defeza Nasionál (IDN), Capitão-de-Mar-e-Guerra, Donaciano da Costa Gomes ‘Pedro Klamar Fuik’, hodi ko’alia atu reativa hikas Sala Situasaun.

“Primeiru-Ministru bolu ami hodi ko’alia kona-ba oinsá atu reativa filafali Sala Situasaun ne’ebé mak implementa iha situasaun Estadu Emerjénsia dahuluk, tanba haree katak situasaun moras ida-ne’e risku no bele dehan katak loron ba loron ameasa hela ita,” Brigadeiru Jenerál Aluk, relata hafoin ramata reuniaun ho Xefe Ezekutivu iha Palásiu Governu, segunda ne’e.

Notísia relevante: PM Taur Enserra Sala Situasaun Maibé Gabinete Jestaun Krize Kontinua Funsiona

Nia hatutan, daudaun sei hein despaisu husi PM, hafoin sei forma estrutura ida ne’ebé kompoen mós Ministériu Saúde (MS) hodi implementa medida sira.

“Estrutura hanesan uluk maibé ninia númeru maka reduzidu, instituisaun rua ne’e klaru ona atu partisipa. Felizmente transmisaun lokál seidauk iha, maibé di’ak liu prevene ho medida ne’ebé ita hanoin di’ak atu evita transmisaun lokál,” nia akresenta.

Reativasaun servisu Sala Situasaun, ninia foku prinsipál iha liña fronteira terrestre, tanba kazu konfirmadu COVID-19 maioria importadu husi sidadaun ne’ebé mai husi nasaun viziñu no tama husi fronteira terrestre.

“Foku liu ba fronteira, liuliu muníspiu Covalima, Bobonaro no Rejiaun Administrativa Espesiál Oé-cusse Ambeno (RAEOA) tanba ema nafatin tama sai ilegalmente no ida-ne’e mak lori risku boot mai ita. Ne’ebé reativa Sala Situasaun ne’e sei kria unidade territoriál atu kontrola munísipiu sira ne’e, ho koordenasaun klaru hamutuk ho autoridade lokál sira,” nia esplika.

Pesoál sira ne’ebé sei hola parte iha unidade territoriál mai husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Sala Situasaun CIGC estabelese bazeia ba Diploma Ministeriál númeru 14/2020, loron 31 marsu, ho baze lei númeru 2/2010, loron 21 abríl, Lei Seguransa Nasionál.

Órgaun espesializada ne’e hariik hodi fó asesoria no konsulta ba koordenasaun téknika operasionál ba entidade sira ne’ebé kompoin iha Sistema Integradu Seguransa Nasionál.

Atu funsiona Sala Operasaun ne’e, Primeiru-Ministru ho baze despaisu númeru 015/PM/III/2020, nomea estrutura na’in-10, ne’ebé Xefe Governu rasik hanesan Komandante Operasionál.

Iha loron 30 juñu 2020, Xefe Governu ofisialmente enserra servisu Sala Situasaun CIGC tanba momentu ne’ebá Governu deside la estende Estadu Emerjénsia (EE).

Hafoin enserra, PM ne’ebé lidera direta Sala Situasaun entrega hikas koordenasaun serbisu ba MS hodi kontinua hala’o prevensaun no metigasaun ba surtu COVID-19.

Maski Sala Situasaun la funsiona ona maibé Gabinete Jestaun Krize ne’ebé tutela mós iha Gabinete Primeiru-Ministru (GPM) kontinua eziste no hala’o nafatin serbisu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here