Dezeñu futuru edifísiu PNTL andar haat (4). Imajen Tatoli/Eugénio Pereira

DILI, 28 janeiru 2021 (TATOLI)–Komandu PNTL koopera ho Diresaun Nasionál Terra no Propriedade (DNTP) aprezenta ona karta notifikasaun ikus ba  uma-kain 11 ne’ebé hela iha área afetadu ba konstrusaun futuru edifísiu PNTL iha Caicoli.

Komandante Jerál Polísia Nasionál Timor-Leste (PNTL), Komisáriu Polísia, Faustino da Costa dehan abitante sira-ne’e tenke muda sai ona, hodi fó fatin ba kompañia hodi ke’e ona rai hodi haluan konstrusaun edifísiu refere.

“Notifikasaun ba uma-kain 11 ne’ebé hela iha parte ne’ebá (edifísiu tribunál rekursu nia oin) ne’e última notifikasaun. Espera ita-nia komunidade koopera,” Komisáriu Faustino ba jornalista iha Palásiu Prezidente Nicolau Lobato, Bairru Pité, Dili, kinta ne’e.

Antes ne’e, Xefe Suku Caicoli, Hipolito Marques Sarmento husu ba Komandu PNTL atu fó kompensasaun ba uma-kain 11 ne’ebé to’o agora seidauk muda sai.

Hipolito informa, ninia povu la aseita atu Governu fó kompensasaun ba kada família simu de’it rihun $10, tanba la to’o ba sira atu kompra materiál konstrusaun no sosa rai foun.

“Povu hakarak Governu fó kompensasaun loloos ne’e rihun $20. Tanba se fó de’it rihun $10, Dili ne’e ita sosa de’it rai ida mós la kotu no halo uma mós la too,” nia lamenta.

Hipolito tenik, uma-kain 11 prontu koopera ho Estadu no sira apoiu polítika Governu hodi harii edifísiu ne’e, maibé tenke hasai komunidade ho dignu.

Entretantu, Komandu PNTL iha 05 marsu 2019 liuhosi notifikasaun ba Ministériu Justisa fó ona kompensasaun ho orsamentu rihun $32.7 ba família balun.

Futuru edifísiu PNTL ho andar haat (4) kompleta ho fasilidade teknolojia modernu, sei harii ho durasaun tinan ida ho balun.

Konstrusaun ne’e kaer hosi Kompañia Internasionál Shanghai Constraction Group Co, Ltd (SCG) no konsutan PT. Ciriajasa Cipta Mandiri in JV With JKC Consultan Engineering Unipesoal Lda ho valór orsamentu $10,177,638.20.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here