Inspetór Jerál bá Jogu sira, Domingos da Costa Guterres. Imajen TATOLI/Francisco Simões

DILI, 01 fevereiru 2021 (TATOLI)-Ministériu Turizmu, Komérsiu no Indústria (MTKI), liuhosi Inspesaun Jerál ba Jogu (IGJ, sigla portugés) hamutuk ho Polísia Nasionál Timor-Leste (PNTL), hahú diskute kalendáriu atu halo inspesaun ba jogu ilísitu sira iha territóriu laran.

Iha loron (21/01), MTKI ho PNTL asina ona entendimentu ho objetivu atu kontrola jogu ilísitu ho objetivu atu regulariza jogu sira atubele hatama reseita ba Estadu.

“Ami atu halo implementasaun ba entendimentu ne’ebé asina ona ho PNTL, ne’ebé daudaun diskute hela kalendáriu implementasaun ho Komisáriu PNTL atubele halo asaun ba jogu ilísitu sira iha nasionál to’o postu administrativu sira iha territóriu Timor-Leste iha tinan ida-ne’e nia laran,” Inspestór Jerál Jogu, Domingos da Costa Guterres, informa ba Agência TATOLI iha ninia knaar fatin, Bebora, segunda ne’e.

Notísia relevante: MTKI-PNTL asina MoU kontrola jogu ilegál 

Inspetór Jogu nota katak durante ne’e jogu ilegál sira la’ós de’it komete husi empreza ne’ebé seidauk rejistu, maibé empreza ne’ebé iha lisensa ona mós komete atividade ilísitu.

Tanba ne’e, iha fulan ne’e tuir planu instituisaun rua sei finaliza ona kalendáriu implementasaun hodi hahú halo inspesaun jogu ilísitu sira-ne’ebé daudaun la’o hela iha Timor-Leste.

“Ita haree no tau-matan ba buat sira ne’e atu labele mosu ka halakon reseita ba kofre Estadu, maibé loron ba inspesaun ne’e segredu,” nia akresenta.

Ekipa inspesaun ne’e kompostu husi MTKI, IGJ, PNTL inklui mídia sira atu garante transparánsia.

Bainhira halo inspesaun mak deteta empreza sira komete jogu ilísitu, mak sei selu koima ho valór mínimu $10.000 to’o $20.000 no fasilidade ka matéria sira mós sei apreende hodi destroi.

Nune’e, Inspetór Jerál Jogu ne’e husu ba empreza sira hapara jogu ilísitu tanba konsidera hanesan krime.

“Husu karik iha empreza balun komete, di’ak liu hapara jogu ilísitu sira ne’e tanba bainhira deteta sei detein no selu koima ho regorozu,” nia apela.

Iha baze dadus, IGJ rejista jogu hamutuk 14 no empreza slot machine rua hanesan MTG Holding, S.A no Timor Holding, Lda.

Aleinde ne’e, modalidade lotária lima hanesan versaun singapura rua no versaun nasionál tolu, ho modalidade toto bola hotu no iha raspadina rua, ne’ebé hetan ona lisensa no kontratu ho Governu ne’ebé kada fulan selu taxa no impostu ba Estadu.

Tuir dekretu-lei númeru 6/2016, mensiona katak iha infrasaun ne’ebé grave selu koima $10.000 to’o $20.000 no infrasaun administrativa ba sira ne’ebé legál, maibé la kumpre regra ruma iha kontratu sei selu koima $500 to’o $10.000.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here