Asina MoU entre MTKI no PNTL ho objetivu atu kontrola jogu ilísitu sira. Imajen Mídia MTKI

DILI, 21 janeiru 2021 (TATOLI)–Ministériu Turizmu, Komérsiu no Indústria (MTKI) no Polísia Nasionál Timor-Leste (PNTL), asina ona Memorandum of Understanding (MoU) ho objetivu atu kontrola jogu ilísitu.

“Akordu ida-ne’e la signifika atu bandu jogu sira, maibé Governu halo akordu ne’e ho objetivu atu regulariza ita-nia jogu atubele hatama reseita ba Estadu,” Ministru Turizmu, Komérsiu no Indústria (MTKI), José Lucas do Carmo da Silva dehan iha nia intervensaun iha ámbitu asina akordu hodi kontrola jogu ilísitu ne’ebé mak hala’o iha edifísiu MTKI, Bebora, Dili, kinta ne’e.

Iha fatin hanesan, Inspetór Jerál Jogu (IGJ-sigla Portugeza), Domingos da Costa Guterres haklaken  IGJ hamutuk ho Komandu Jerál PNTL tuirmai sei halo asaun sira ne’ebé konkreta atu kombate jogu ilísitu ka atividade ilegál ne’ebé sei buras.

“Iha tempu naruk tebes grupu balun hakarak akumula de’it ba sira-nia interese maibé sira haluha tiha saida mak Estadu Direitu. Estadu la hetan oportunidade ka benefísiu hosi sira-nia jogu ne’e rasik,” nia informa.

Entretantu, Komandante Jerál Polísia Nasionál Timor Leste (PNTL), Komisáriu Polísia, Faustino da Costa hateten, liuhusi memorandu entendimentu ne’e PNTL prontu kontribui atu redús atividade ne’ebé fó prejuizu ba Estadu liuhusi atividade ilísitu sira.

Nia esplika, PNTL nu’udar forsa seguransa ida-ne’ebé iha misaun atu defende legalidade demokrátika, garante seguransa ba ema hotu inklui rikusoin ema hotu ninian iha rai doben TL.

Faustino dehan, importante iha atividade ka eventu sira hanesan ne’e presiza tebes iha fiskalizasaun direta no mós supervizaun inklui monitorizasaun hosi autoridade relevante.

“Atividade sira-ne’e sai fali atividade komérsiu ne’ebé bele fó lukru ba ema ruma bainhira laiha kontrolu no mós monitorizasaun hosi parte relevante,” nia subliña.

Aleinde ne’e, Reprezentante Ministru Interiór atuál  Sekretáriu Estadu Protesaun Sivíl (SEPS), Joaquim Gusmão hateten la’ós ona segredu ba públiku katak atividade jogu ne’e atrai tebes ema.

“Jogu sira tenke iha lisensa atividade nune’e bele hatama reseita ba Estadu,” nia sujere.

Tuir Joaquim katak nota entendimentu ida-ne’e fó biban no kbiit ba PNTL atubele regula jogu sira ne’ebé mak ilísitu.

Jornalista: Natalino Costa

Editór: Xisto Freitas

1 KOMENTÁRIU

  1. Hau atu sujere deit ba Governu liuhusi MTKI, favor ida bele halo identifikasaun ida ba jogus sira ne’ebe existe iha Timor laos deit nia validade maibe mos ninia efeitu negative ba komunidade. Jogo hanesan (Bola guling, Kasinu, SDSB etc) favor analiza husi fator merugikan komunidade molok legaliza. Obrigado

    Marco

HAKEREK NO HATÁN

Please enter your comment!
Please enter your name here