Ministru Turizmu, Komérsiu no Indústria, Lucas do Carmo da Silva, hamutuk ho ekipa, akompaña aprezentasaun ezbosu diploma ministeriál, iha edifísiu MTKI, Mandarin, tersa (19/01). Imajen TATOLI/Florêncio Miranda Ximenes

DILI, 19 janeiru 2021 (TATOLI)--Ministériu Turizmu, Komérsiu no Indústria (MTKI) liuhosi Inspesaun Jerál ba Jogu (IGJ, sigla portugés) hahú halo diskusaun ba ezbosu diploma ministeriál regula jogu tradisionál sira.

Ezbosu ho kontiúdu to’o kapítulu V ho artigu 17 sei regula jogu tradisionál no fó lisensa ba jogu futu-manu (luta de galos), bola duir (bola guling), kuru-kuru, rolete, bingo, soe kilo inklui jogu tradisionál seluk.

“Ha’u halo apresiasaun ba esforsu ekipa Inspesaun Jerál ba Jogu ne’ebé konsege elabora ona ezbosu diploma ministeriál tanba hanesan pasu importante atu regula jogu tradisionál sira ho objetivu atu rekolla reseita ba kofre Estadu,” Ministru Turizmu, Komérsiu no Indústria, José Lucas do Carmo da Silva, hateten hafoin akompaña aprezentasaun ezbosu iha edífisiu MTKI, Mandarin, tersa ne’e.

Notísia relevante: Tinan 2020, IGJ kontribui reseita millaun $1,4 ba kofre Estadu

Maski nune’e, presiza tempu semana ida ba Gabinete Ministru atubele halo apresiasaun no fó komentáriu no rekomendasaun balun, inklui redasionál ba IGJ atu hadi’a no kompleta di’ak liután lejizlasaun ne’e.

MTKI presiza duni diploma Ministériál  atubele regula jogu tradisionál iha territóriu laran tomak, tanba diploma ne’e hanesan lei-oan ne’ebé hamosu dekretu-lei númeru 6/2016 hodi regula espesífiku liután kona-ba jogu tradisionál.

“Jogu tradisionál ne’ebé eziste no la’o iha ita-nia rai laran durante ne’e liuhosi beiala sira, maibé tuir ami nia haree katak presiza regula hodi tau buat hotu iha nia fatin atu labele loke naran de’it iha komunidade nia le’et. Bainhira ita regula di’ak sei fó reseita ba kofre Estadu no atrai turízta sira,” nia akresenta.

Bainhira lejizlasaun ne’e implementa, Governu sei fó sansaun ba pesoál singular no koletivu  ne’ebé la kumpre regra no sei hetan sansaun hanesan aplikasaun koima tuir retornu ne’ebé hetan.

Iha tinan 2021 nia laran, MTKI hahú halo identifikasaun fatin atubele halo estudu viabilidade atu halo konstrusaun ba fatin própriu ba jogu tradisionál sira.

Tuir ezbosu diploma ministerial iha ártigu 4, atu hetan lisensa, rekerente presiza halo pedidu ba IGJ ne’ebé kompleta ho kópia billete indetidade, estatutu, rejistu krimál, referénsia bánkaria, númeru TIN, identifikasaun espesífiku área jogu, modelu jogu no planu realizasaun no instalasaun ne’ebé hetan aprovasaun hosi Inspesaun Jerál.

Iha artigu 5 sita katak ba pesoál singular ne’ebé hakara rekere ba tipu jogu ida, presiza iha saldo permanente no garantia saldo iha Banku Nasionál Komérsiu Timor-Leste (BNCTL, sigla portugés) ho montante hahú hosi $15.000 to’o $25.000.

Enkuantu ba pesoál koletivu, saldo iha konta bánkaria permanente tenke iha $30.000 no garantia saldo $50.000.

Entretantu, iha ártigu 12 koa’lia kona-ba taxa ba futu-manu, ne’ebé ba kada jogu selu hahú hosi $100 to’o $2.000 tuir retornu ne’ebé hetan, bola guling ho taxa $100, kuru-kuru ho taxa normál $100, rolete ho taxa normál $20, Bingo ho taxa $50 no taxa ba soe kilo $10.

Aprezentasaun ezbosu ne’e partisipa hosi Ministru Turizmu, Komérsiu no Indústria, José Lucas do Carmo Silva inklui ekipa Asesor Jurídiku Gabinete Ministru, Inspetór Jerál Jogu, Domingos da Costa Guterres no ekipa Jurídiku hamutuk ho funsionáriu MTKI no IGJ, nune’e bele kontribui rekomendasaun ruma no halo redasaun, hafoin halo aprovasaun antes publika iha Jornál Repúblika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here