Ministru Asuntu Parlamentár no Komunikasaun Sosiál, Francisco Martins da Costa Jerónimo, akompaña husi Sekretaria Estadu Komunikasaun Sosiál, Merício Juvinal dos Reis ‘Akara’ fó pose ba Konsellu Diretivu Agência TATOLI, iha salaun PCM, Palásiu Governu, segunda (01/02). Imajen TATOLI/António Gonçalves

DILI, 01 fevereiru 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, akompaña husi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, fó pose ba Konsellu Diretivu TATOLI- Agência Noticiosa de Timor-Leste, Institutu Públiku (I.P) ba mandatu tinan-haat.

Konsellu Diretivu kompostu husi Prezidente, Manuel Pinto, Vise-Prezidente Asuntu Mídia no Jornalístiku, Xisto Freitas Piedade no Vise-Prezidente Asuntu Administrasaun no Finansa, Olandino da Costa.

Nomeasaun Prezindente Agência TATOLI liuhosi Proposta Rezolusaun Governu, ne’ebé bazeia ba sob proposta MAPKOMS, ne’ebé nu’udar membru Governu tutela, enkuantu nomeasaun Vise-Prezidente na’in-rua bazeia ba sob proposta Prezidente Konsellu Diretivu ba ministru tutela.

Notísia relevante: Governu nomea Manuel Pinto lidera Agência TATOLI

Iha seremónia pose, Ministru Francisco, enkoraja Konsellu Diretivu  Agência TATOLI atu serbisu maka’as no sai mídia estatál ne’ebé kredível bainhira divulga informasaun ba públiku.

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves

Biban ne’e, governante ne’e mós husu Konsellu Diretivu atu esforsu transforma insititusaun TATOLI sai diferente ho karakter mudansa pozitivu ba sosiedade.

“Ha’u iha konfiasa ba ita-bo’ot sira hotu ho ekipa, atu halo buat hotu tuir ema hotu nia hakarak, no Agência TATOLI labele ikus iha kotuk kompara fali ho mídia seluk, maibé tenke iha oin ho kredível, tanba ne’e presiza serbisu maka’as no lalais,” Ministru dehan, iha salaun Prezidénsia Konsellu Ministru (PCM, sigla portugés), Palásiu Governu, segunda ne’e

Ministru parabeniza emposadu no ekipa tomak iha Agência TATOLI no husu atu asume knaar ho responsabilidade.

Iha biban hanesan, iha ninia diskursu ámbitu simu pose, Prezidente Konsellu Diretivu Agência TATOLI, Manuel Pinto, agradese ba fiar ne’ebé Governu liuhosi MAPKOMS no SEKOMS fó ba nia atu lidera mídia estatál ne’e.

“Ha’u hato’o ha’u-nia sentimentu agradese ba konfiansa ne’ebé atribui husi VIII Governu Konstitisionál no promete sei hala’o knaar ho responsabilidade atu hasa’e integridade TATOLI.IP hodi serví públiku,” nia promete.

Prezendente Agência TATOLI, Manuel Pinto. Imajen TATOLI/António Gonçalves

Nia dehan, iha faze inísiu mandatu, iha vizaun atu halo mídia Estadu ne’e bele goja direitu autonomia administrativa, finanseira no patrimóniu própriu.

Tanba ne’e, nia otimista liuhosi programa jerál rua hanesan dezenvolvimentu institusionál no espansaun kontiúdu bele hasa’e dezempeñu serbisu ho kualidade, hatuur regra no regulamentu tuir nesesidade inklui hasa’e kualidade atendimentu direitu informasaun.

Atu atinje programa hirak ne’e, Prezidente Agência TATOLI iha forma estratéjiku neen atu orienta ninia ekipa sira iha serbisu operasionalizasaun.

“Foku prinsipál maka reforsa funsionamentu instituisaun, reforsa serbisu redasaun, asegura fasilidade no ekipamentu serbisu, halo rekrutamentu, formasaun no kapasitasaun ba jornalista no funsionáriu sira, no ikus liu halo parseria ho instituisaun privadu no públiku,” Manuel Pinto subliña.

Aleinde ne’e, Prezidente Konsellu Diretivu Agência TATOLI hakarak funsiona ho di’ak institutu públiku ne’e iha aspeitu institusionál.

“Notísia TATOLI hotu tenke diversifikadu no kualidade, kobre iha nível oin-oin no sei publika iha lian tetum, portugés, inglés no lian indonézia, tuir karater TATOLI nian,” nia akresenta.

Antes ne’e, iha loron 01 setembru 2020, Manuel Pinto, asume knaar nu’udar Prezidente interinu Agência TATOLI to’o agora, hodi troka Prezidente sesante, José da Costa, ne’ebé deside resigna-an no husik kargu ne’e iha loron 31 agostu 2020.

Ministru Asuntu Parlamentár no Komunikasuan Sosiál, Francisco Martins da Costa Jerónimo, akompaña husi Sekretaria Estadu Komunikasaun Sosiál, Merício Juvinal dos Reis ‘Akara’ fó pose ba Konsellu Diretivu Agência TATOLI, iha salaun PCM, Palásiu Governu, segunda (01/02). Imajen TATOLI/António Gonçalves

Iha loron 07 marsu 2017, liuhosi reuniaun Konsellu Ministru aprova kriasaun Agência TATOLI, nu’udar kontinuasaun hosi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.

Objetivu prinsipál husi Agência TATOLI maka sai fonte informasaun ofisiál, ho produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.

Iha futuru, ajénsia notisioza ne’e bele dezenvolve no funsiona hanesan sentru produsaun sinema no dokumentasaun Estadu, institutu opiniaun públiku, hanesan fórum informasaun públika, sentru jestaun arkivu no dokumentasaun Estadu, no hanesan sentru formasaun no peskiza ne’ebé aplika ba komunikasaun.

Jornalista: Florêncio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here