Prezidente Agência TATOLI, Manuel Pinto. Imajen TATOLI/Egas Cristovão

DILI, 13 janeiru 2021 (TATOLI)—Governu liuhosi reuniaun Konsellu Ministru (KM) deside nomea atuál Vise-Prezidente Asuntu Mídia no Jornalístiku Agência Noticiosa de Timor-Leste, Institutu Públiku (TATOLI,I.P), Manuel Pinto, ba Prezidente Konsellu Diretivu  Ajénsia Estadu ne’e, ba mandatu tinan-haat.

Nomeasaun ne’e liuhosi Proposta Rezolusaun Governu, ne’ebé bazeia ba sob proposta Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé nu’udar membru Governu tutela, aprezenta iha KM ho kandidatu úniku no hetan apresiasaun hosi ezekutivu sira.

Ministru Prezidénsia Konsellu Ministru, Fidelis Manuel Leite Magalhães, hateten nomeasaun ne’e bazeia ba esperiénsia no laiha dúvida.

“Bainhira Ministru ida aprezenta kandidatu ida, tenke prienxe rekezitu sira, iha kazu ida-ne’e nia prienxe rekezitu ba área ne’ebé mak nia atu lidera. Ne’ebé ho esperiénsia no koñesimentu edukasaun sufisiente atu ezerse funsaun ida-ne’e ho di’ak. Motivu ne’e maka Konsellu Ministru laiha dúvida ba proposta MAPKOMS tanba haree katak úniku pessoa ne’e ho esperiénsia durante tinan hirak ne’e, naton ona atubele ezerse kargu hanesan Prezidente Konsellu Diretivu TATOLI ho di’ak,” Ministru Fidelis dehan hafoin ramata reuniaun ezekutivu, iha Palásiu Governu, kuarta ne’e.

Antes ne’e, iha loron 01 setembru 2020, Manuel Pinto, asume knaar nu’udar Prezidente interinu Agência TATOLI to’o agora, hodi troka Prezidente sesante, José da Costa, ne’ebé deside resigna-an no husik kargu ne’e iha loron 31 agostu 2020.

Notísia Relevante: MAPKOMS nomea Manuel Pinto ba Prezidente Agência Tatoli interinu

Iha tinan 2015, Manuel Pinto, foti estudu iha área Administrasaun Públika iha Universidade Nasional Timor Lorosa’e (UNTL).

Nia hahú karreira profesionál hanesan Jornalista iha Suara Timor Lorosa’e (STL) iha tinan 2006 to’o 2010.

Iha tinan 2010 to’o 2013, hanesan Asesoria Imprensa ba Vise Primeiru-Ministru Asuntu Jestaun no Administrasaun, Mario Viegas Carrascalão.

Nune’e, iha tinan 2012 to’o 2013 hanesan Jornalista, Editór no Koordenadór Kobertura iha Jornál Nasionál Diário, hafoin iha 2013 to’o 2015 hanesan Editór no Koordenadór Kobertura iha jornál diáriu, Timor Post.

Iha maiu 2016, Manuel Pinto, hahú ninia karreira jornalizmu iha Agência TATOLI, hanesan Jornalista dahuluk iha mídia Estadu ne’e, hamutuk ho jornlista na’in-neen seluk, hodi estabelese embriaun Agência TATOLI, hamutuk ho ekipa Sekretaria Estadu Komunikasaun Sosiál (SEKOMS).

Hafoin sai jornalista iha Agência TATOLI durante tinan-ida no hetan formasaun oin-oin iha área jornalizmu, maka iha tinan 2017 to’o 2019, nia hahú asume knaar hanesan Editór Ezekutivu.

Iha 2019 to’o agora, Manuel Pinto, asume knaar hanesan Vise-Prezidente Asuntu Mídia no Jornalístiku no iha tempu hanesan, iha setembru 2020 asume mós knaar hanesan Prezidente Konsellu Diretivu interinu hodi hein nomeasaun Prezidente definitiva.

Iha loron 07 marsu 2017, liuhosi reuniaun KM aprova kriasaun Agência TATOLI, nu’udar kontinuasaun hosi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.

Objetivu prinsipál hosi Agência TATOLI maka sai fonte informasaun ofisiál, ho produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.

Iha futuru, ajénsia notisioza ne’e bele dezenvolve no funsiona hanesan sentru produsaun sinema no dokumentasaun Estadu, institutu opiniaun públiku, hanesan fórum informasaun públika, sentru jestaun arkivu no dokumentasaun Estadu, no hanesan sentru formasaun no peskiza ne’ebé aplika ba komunikasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here