Primeiru-Ministru, Taur Matan Ruak, hasai foto hamutuk ho Profesionál Saúde sira no ekipa ne’ebé integra iha CIGC, iha ámbitu transferénsia koordenasaun Sala Situasaun ba MS iha CCD, tersa (30/06). Imajen Tatoli/Egas Cristovão

DILI, 30 juñu 2020 (TATOLI) – Primeiru-Ministru, Taur Matan Ruak ofisialmente enserra ona servisu Sala Situasaun, Sentru Integradu Jestaun Krize (CIGC, sigla portugés) tanba Governu deside la estende Estadu Emerjénsia.

Xefe Governu ne’ebé lidera direta Sala Situasaun durante ne’e entrega hikas koordenasaun servisu ba Ministériu Saúde (MS) hodi kontinua hala’o prevensaun no metigasaun ba surtu COVID-19, maski Timor-Leste rasik livre ona hosi pandemia globál ne’e.

Maski Sala Situasaun la funsiona ona maibé Gabinete Jestaun Krize ne’ebé tutela mós iha Gabinete Primeiru-Ministru (GPM) kontinua eziste no hala’o servisu iha Sentru Konvensaun Dili (CCD, sigla portugés).

Xefe Governu hateten, movimentu bá-mai no atividade sira komesa filafali tama iha normalidade, maibé nafatin kuidadu iha fronteira sira.

“Atu dehan Timor-Leste bele hakilar ona vitória, maibé atu dehan katak seidauk bele hakilar vitória enkuantu seidauk iha vasina. Sala Situasaun mak taka maibé Gabinete Jestaun Krize seidauk bele fila ba Palásiu Governu, sira nafatin iha CCD atu halo akompañamentu evolusaun situasaun servisu ba oin,” hateten PM Taur iha ámbitu transferénsia koordenasaun Sala Situasaun ba MS iha CCD, tersa ne’e.

Notísia Relevante: PM Taur Formaliza Ona Sala Jestaun Krize no Estrutura ba Luta Kontra COVID-19

Xefe Governu subliña, karik iha nesesidade gabinete ne’e sei hamrik hodi fó apoiu ba MS hodi simu responsabilidade foun hodi hamutuk kombate COVID-19

“Ita laiha dalan seluk, ita nia esforsu sentrál mak ita-nia sidadaun sira, vida, no saúde. Objetivu sei mantein Gabinete Jestaun Krize tanba atu prevene ba senáriu piór, invez senáriu piór mai ita halai tun-sa’e hanesan uluk hodi buka fatin hodi instala komputadór. Entaun agora preparadu, nune’e bainhira iha ameasa ruma senáriu maka rekorre desizaun drástika”,

Iha loron 21 marsu, PM Taur asina Diploma Ministeriál númeru 14/2020, loron 31 marsu, kona-ba estabelesementu Sala Situasaun CIGC no despaisu ba nomeasaun estrutura na’in-10 Sala Situasaun.

Sala Situasaun organiza ba unidade ualu hanesan komandu opersionál, estadu maiór koordenadór, forsa tarefa (liña ministeriál sira) ba prevensaun no mitigasaun pandemia Covid-19, koordenadór ofisiál ligasaun ba forsa tarefa sira, ekipa estudu no análiza ba risku, sekretáriadu ba administrasaun no finansa, destakamentu realsaun rápida no unidade informasaun públika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here