Diretór Ezekutivu Estratéjia Nasionál Empregu, Aniceto Leto Soro. Imajen TATOLI/Joanico de Araújo.

DILI, 01 fevereiru 2021 (TATOLI)—Diretór Ezekutivu Estratéjia Nasionál Empregu, Aniceto Leto Soro, hatete iha tinan haat nia-laran (2017-2020) parte Komisaun Nasionál Kontra Traballu Infantil (CNCTI-sigla portugés) seidauk bele halo peskiza ba traballu infantil nian iha territóriu Timor-Leste tanba situasaun polítika no pendemia COVID-19.

Notísia Relevante: Governu halo planu atu labarik sira labele halo servisu todan

“Ita foin mak halo peskiza ba tinan 2016. Ita seidauk halo peskiza tan tanba situasaun polítika. Maibé, loloos ne’e ita halo peskiza tinan kada tinan rua dala ida. Agora tinan haat ona ita seidauk halo peskiza tanba situasaun polítika iha rai-laran no COVID-19. Ita foin mka halo peskiza dahuluk nian iha 2016,” Aniceto Leto Soro hateten ba Agência TATOLI iha nia knaar fatin, Caicoli, Dili, segunda ne’e.

Aniceto Leto Soro hatutan, iha 2021 ne’e parte Komisaun Nasionál Kontra Traballu Infantil (CNCTI)  bele halo ona peskiza no rekolla dadus foun kona-ba labarik sira ne’ebé involve aan iha traballu infantile no halo movimentu iha dalan ninin hodi faan sasán, tanba CNCTI haree ba mudansa no progresu hosi medida no asaun ne’ebé sira foti ona.

“Ita seidauk iha atividade bainhira ita seidauk iha planu. Tanba ne’e, ita rekomenda ba Governu atu aselera lalais planu ne’e. Tanba planu ne’e mak sei sai baze ba asaun anuál hodi halo perskiza ba traballu infantile iha Timor-Leste,” nia hateten.

Nia dehan, CNCTI nia objetivu dahuluk mak tenke halo sensibilizasaun ba inan-aman sira iha asuntu ne’ebé mak sai xave importante mak lei. Sensibilizasaun ne’e, nia dehan, oinsá mak inspetór sira halo servisu ne’ebé di’ak, ida-ne’e presiza rekomenda ba parte relevante no tenke tau orsamentu ne’ebé própriu no adekuadu atu implementa planu ne’e.

Diretór ne’e hatutan, asuntu traballu infantil ne’e ekonómia no sosiál no loloos ne’e la’ós SEFOPE mak halo servisu ida-ne’e maibé servisu interligadu liuliu Ministériu Solidaridade Sosiál no Inkluzaun (MSSI), Ministériu Saúde (MS) no Ministériu Edukasaun Juventude no Desportu (MEJD) tanba ministériu tolu ne’e mak sai xave importante ba implementasaun planu ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here