Reitór UNTL foun, Joao Soares Martins. Imajen Tatoli/Egas Cristovão

DILI, 29 janeiru 2021 (TATOLI)—Reitór Universidade Nasionál Timor Lorosa’e (UNTL) ba periúdu 2021-2026, João Martins, hakarak hadi’ak dezempeñu instituisaun nian iha área siénsia, teknolojia no inovasaun, nune’e mós reforsa papél universidade iha prosesu kontrusaun Estadu.

“Durante mandatu tinan lima hakarak hadi’ak no dezenvolve UNTL iha konkretizasaun ninian misaun iha área siénsia, teknolojia no inovasaun. Ami mós hakarak atu haforsa jestaun universidade nian inklui haforsa programa akadémiku, peskiza no sebisu komunitáriu”, João Martins hateten iha serimónia tomada de pose ne’ebé hala’o iha Fakuldade Siénsia no Teknolojia, Hera (29/01).

Notísia Relevante:João Martins eleitu ba Reitór UNTL

Nia hatutan, sei reforsa mós Sentru Nasionál Investigasaun Sientífika, Institutu Nasionál Linguístika, Sentru Formasaun Avansada, no Sentru ezistente sira seluk iha UNTL.

Iha kontestu ida ne’e, reitór eleitu UNTL João Martins sei reforsa kapasitasaun rekursu umanu ne’ebé kualifikadu, infraestrutura, kolaborasaun iha nível nasionál no internasionál, inklui sei apoia asosiasaun estudante sira.

“Ami sei garante moris di’ak professór sira-nian iha UNTL, funsionáriu administrasaun no lojístika, inklui pesoál limpeza no seguransa sira, nomós estudante no hadi’ak kualidade UNTL,” nia subliña.

Prioridade seluk ne’ebé João Martins atu dezenvolve mak hanesan, sei halo revizaun ba estatutu ne’ebé hatuur iha Dekretu-Lei 16/2010 no aprovadu iha Konsellu Ministru, iha 25 agostu 2010, hosi Primeiru-Ministru, Kay Rala Xanana Gusmão, Ministru Edukasaun, João Câncio Freitas no promulgadu hosi Prezidente Repúblika, José Ramos Horta.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here