Reitór UNTL, João Soares Martins. Imajen Tatoli/Tomé Amado.

DILI, 03 dezembru 2020 (TATOLI)—Estrutura Konsellu Jerál Universidade Nasionál Timor Lorosa’e (UNTL), kinta ne’e, hili ona João Soares Martins nu’udar Reitór foun UNTL ba periodu 2021-2026 liuhusi eleisaun sekreta ida ho votus afavór 10.

Membru Estrutura Konsellu Jerál UNTL hamutuk na’in 12 maka iha diretu hodi fó votus ba kandidatu na’in tolu maka hanesan Reitór eleitu João Soares Martins ho votus 10, Reitór sesante Francisco Miguel Martins ho votus 2 no Acacio Cardoso Amaral 0.

Notísia Relevante :Ema na’in ualu konkore ba vaga Reitór UNTL

Reitór foun hafoin eleitu husu ba estrutura UNTL nian hotu atu  servisu hamutuk no koopera malu hodi dezenvolve UNTL ba futuru.

“Maske ha’u mai ho planu no programa ba tinan lima nian, maibé ha’u mós kontinua konsidera planu no programa anteriór ne’ebé reitór sesante trasa ona. Programa ne’ebé presiza kontinua ha’u tenke tau nafatin iha konsiderasaun,” dehan nia hafoin eleitu iha Sala Auditoria Fakuldade Enjinária UNTL Hera, ohin.

Nu’udar Reitór eleitu hakarak hato’o agradesementu ba parte hotu liliu ba Konsellu Jerál UNTL nian ne’ebé fó ona konfiansa ba nia hodi lidera fali UNTL ne’e ba tinan lima.

“Ho komitmentu ne’ebé mak ha’u iha sei servisu maka’as atu UNTL bele sai duni instituisaun ensinu superiór estatál ida iha nasaun ho kualidade,”katak nia.

Durante kampaña, Reitór ne’e dehan bainhira eleitu sei investe maka’as iha área laboratóriu hodi hadi’a kualidade ensinu aprendizajen ba estudante sira.

“Ha’u nia mehi ne’e tenki sai realidade se karik ha’u eleitu ba reitor UNTL ha’u sei investe maka’as iha laborartóri iha kada fakuldade hodi nune’e bele ajuda ita-nia estudante sira iha atividade prátika nian,” nia hateten.

Notísia Relevante :Eleisaun ba Reitór UNTL foun sei akontese iha semana oin

Jornalista : Tomé Amado

Editór :Agapito dos Santos

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here